ഗുവാഹത്തി: ഒരു ഗോളിനു പിന്നില്‍ നിന്നു രണ്ടു ഗോളുകള്‍ തിരിച്ചടിച്ച് നോര്‍ത്ത്ഈസ്റ്റ് യുനൈറ്റഡിനെ അവരുടെ തട്ടകത്തില്‍ കീഴടക്കി മുന്‍ ചാംപ്യന്‍മാരായ അത്‌ലറ്റിക്കോ ഡി കൊല്‍ക്കത്ത ഐ.എസ്.എല്ലിലെ മൂന്നാം വിജയം കുറിച്ചു. ഒപ്പം പോയിന്റ് പട്ടികയില്‍ ഒന്നാം സ്ഥാനത്തെത്താനും അവര്‍ക്കു സാധിച്ചു.  
39ാം മിനുട്ടില്‍ നിര്‍മല്‍ ഛേത്രിയുടെ പാസില്‍ നിന്നു എമിലിയാനോ അല്‍ഫരോ ഹെഡ്ഡറിലൂടെ വടക്കുകിഴക്കന്‍മാരെ മുന്നിലെത്തിച്ചു. രണ്ടാം പകുതിയില്‍ ആക്രമണം കടുപ്പിച്ച കൊല്‍ക്കത്ത കൃത്യമായ ഇടവേളയില്‍ രണ്ടു ഗോളുകള്‍ അടിച്ചാണ് ഉജ്ജ്വല തിരിച്ചുവരവ് നടത്തിയത്. 63ാം മിനുട്ടില്‍ ഹെല്‍ഡര്‍ പോസ്റ്റിഗ അവരെ ഒപ്പമെത്തിച്ചു. സമനിലക്കുരുക്ക് മാറ്റാന്‍ ഇരു പക്ഷവും കൊണ്ടുപിടിച്ചു ശ്രമിക്കവെ 82ാം മിനുട്ടില്‍  യുവാന്‍ ബെലന്‍ക്കോസോ അത്‌ലറ്റിക്കോക്ക് വിജയം സമ്മാനിച്ചു.