കല്‍പ്പറ്റ: ഗ്രാമീണമേഖലയിലെ കായിക താരങ്ങളെ കണ്ടെത്തുന്നതിനും അടിസ്ഥാന സൗകര്യങ്ങള്‍ വികസിപ്പിക്കുന്നതിനുമായുള്ള ഖേലോ-ഇന്ത്യ മത്സരങ്ങള്‍ നവംബര്‍ 10 മുതല്‍ 12 വരെ വിവിധ സ്‌റ്റേഡിയങ്ങളിലായി നടക്കുമെന്ന് സ്‌പോര്‍ട്‌സ്‌കൗണ്‍സില്‍ പ്രസിഡന്റ് എം മധു വാര്‍ത്താസമ്മേളനത്തില്‍ അറിയിച്ചു. നേരത്തെ ഉണ്ടായിരുന്ന പൈക്ക പദ്ധതിയുടെ പുതിയ പതിപ്പാണ് ഖേലോ-ഇന്ത്യ. കല്‍പ്പറ്റ എസ്.കെ.എം.ജെ ഹയര്‍സെക്കന്‍ഡറി സ്‌കൂള്‍, എന്‍.എം.ഡി.സി ജൂഡോഹാള്‍, മാനന്തവാടി ഗവ. വൊക്കേഷണല്‍ ഹയര്‍സെക്കന്‍ഡറി സ്‌കൂള്‍, മാനന്തവാടി ഡൈന ഷട്ടില്‍ ഇന്‍ഡോര്‍ സ്‌റ്റേഡിയം, നടവയല്‍ ചെല്ലിവില്ല സ്വിമ്മിങ്പൂള്‍ എന്നിവിടങ്ങളാണ് മത്സരങ്ങള്‍ നടക്കുക. പദ്ധതി പ്രകാരം ജില്ലാ, സംസ്ഥാന, ദേശീയതലങ്ങളിലാണ് മത്സരങ്ങള്‍ സംഘടിപ്പിക്കുന്നത്. മുന്‍ വര്‍ഷങ്ങളില്‍ ബ്ലോക്ക്തല മത്സരങ്ങള്‍ ഉണ്ടായിരുന്നു. എന്നാല്‍ ഈ വര്‍ഷം ബ്ലോക്ക്തല മത്സരങ്ങള്‍ ഉണ്ടാവില്ല. 31.12.2016ന് 14 വയസ് താഴെ പ്രായമുള്ള, 17 വയസിന് താഴെ പ്രായമുള്ളവര്‍ എന്നീ രണ്ട്‌വിഭാഗങ്ങളിലായി അതലറ്റിക്‌സ്, വോളിബോള്‍, തായ്ക്വാണ്‍ഡോ, കബഡി, ഖൊ-ഖൊ, ഫുട്‌ബോള്‍, ബാഡ്മിന്റണ്‍ (ഷട്ടില്‍), സ്വിമ്മിങ്, റെസലിങ്, ബാസ്‌ക്കറ്റ്‌ബോള്‍ എന്നീ ഇനങ്ങളിലാണ് മത്സരങ്ങള്‍. ജില്ലാതല മത്സരങ്ങള്‍ക്ക് നഗരസഭബ്ലോക്ക് പഞ്ചായത്തുകളെ പ്രതിനിധീകരിച്ച് വ്യക്തിഗത ഇനങ്ങളില്‍ രണ്ടുപേര്‍ക്കും ടീമിനത്തില്‍ രണ്ടു ടീമുകള്‍ക്കും മാത്രമെ പങ്കെടുക്കാവു.
ജില്ലാതല മത്സരങ്ങളില്‍ പങ്കെടുക്കുന്നതിനായുള്ള ബ്ലോക്ക്തല എന്‍ട്രികള്‍ നവംബര്‍ അഞ്ചിന് വൈകീട്ട് അഞ്ചിന് മുമ്പ് സെക്രട്ടറി, ജില്ലാ സ്‌പോര്‍ട്‌സ് കൗണ്‍സില്‍, സിവില്‍സ്‌റ്റേഷന്‍, കല്‍പ്പറ്റ നോര്‍ത്ത് എന്ന വിലാസത്തില്‍ ലഭിക്കണം. ജില്ലാതല മത്സരങ്ങളിലെ വിജയികള്‍ക്ക് യഥാക്രമം 1500, 1000, 500 രൂപ നിരക്കില്‍ പ്രൈസ്മണി നല്‍കും. ഖേലോ- ഇന്ത്യ  പദ്ധതിയുടെ ഭാഗമായി നടത്തുന്ന ജില്ലാ-സംസ്ഥാന മത്സരങ്ങളില്‍ നിന്നും ടാലന്റ് കാന്‍ഡിഡേറ്റിനെ തെരഞ്ഞെടുക്കും. ഇവര്‍ക്ക് ഒരു വര്‍ഷത്തേക്ക് പ്രതിമാസം 500, 1000 രൂപ സ്‌കോളര്‍ഷിപ്പ് ലഭിക്കും.