കല്‍പ്പറ്റ: പനമരം ഗ്രാമപഞ്ചായത്ത് അംഗവും വൈസ്പ്രസിഡന്റുമായ ടി മോഹനന്‍ രാജിവക്കണമെന്ന് യു.ഡി.എഫ് പനമരം പഞ്ചായത്ത് കമ്മിറ്റി വാര്‍ത്താസമ്മേളനത്തില്‍ ആവശ്യപ്പെട്ടു. യു.ഡി.എഫിന്റെ ബാനറില്‍ മത്സരിച്ച് വിജയിച്ച ടി മോഹനന്‍ യു.ഡി.എഫ് വോട്ടര്‍മാരെ വഞ്ചിച്ച് സി.പി.എമ്മില്‍ ചേര്‍ന്നിരിക്കുകയാണ്. ഇതുകൊണ്ടുതന്നെ പഞ്ചായത്ത് അംഗത്വം രാജിവച്ച് രാഷ്ട്രീയ ധാര്‍മികത കാണിക്കാന്‍ അദ്ദേഹം ബാധ്യസ്ഥനാണ്. 26 വര്‍ഷം യു.ഡി.എഫിനൊപ്പം നടന്ന് സ്ഥാനമാനങ്ങള്‍ നേടിയ വ്യക്തിയാണ് ടി മോഹനന്‍. അധികാരത്തിന് വേണ്ടി ഇപ്പോള്‍ സി.പി.എമ്മിനൊപ്പം നിന്ന് രാഷ്ട്രീയ കുതിരക്കച്ചവടം നടത്തുകയാണ്. ഇതിനെതിരെയും സി.പി.എമ്മിന്റെ കച്ചവട താല്‍പര്യത്തോടുകൂടിയ രാഷ്ട്രീയ നീക്കത്തിനെതിരെയും യു.ഡി.എഫിന്റെ നേതൃത്വത്തില്‍ ശക്തമായ പ്രക്ഷോഭ പരിപാടികള്‍ സംഘടിപ്പിക്കും. നിലവില്‍ 12-11 എന്ന നിലയിലാണ് പനമരത്ത് യു.ഡി.എഫ് ഭരണം നടത്തുന്നത്. സി.എം.പിയുടെ ഒരംഗം മാത്രം പിന്തുണച്ചാലും എല്‍.ഡി.എഫിന് ഭരണം കിട്ടും. കഴിഞ്ഞ തെരഞ്ഞെടുപ്പില്‍ യു.ഡി.എഫിന് 12 സീറ്റുകള്‍ ലഭിച്ചപ്പോള്‍ ആദ്യത്തെ രണ്ടര വര്‍ഷം പ്രസിഡന്റ് പദവി കോണ്‍ഗ്രസിനും ബാക്കി രണ്ടര വര്‍ഷം ലീഗിനും കൊടുക്കാനായിരുന്നു പനമരത്തെ യു.ഡി.എഫ് ധാരണ.
അതേസമയം വൈസ് പ്രസിഡന്റ് സ്ഥാനം അഞ്ചുവര്‍ഷമാണ് സി.എം.പിക്ക് അനുവദിക്കുകയും ചെയ്തു. അര്‍ഹമായ സ്ഥാനം സി.എം.പിക്ക് കൊടുത്തിട്ടുണ്ടെന്നും അതിനാല്‍ ടി മോഹനന്റെ ചുവടുമാറ്റം നീതിക്ക് നിരക്കുന്നതല്ലെന്നും യു.ഡി.എഫ് പനമരം പഞ്ചായത്ത് കമ്മിറ്റി നേതാക്കളായ ഇബ്രാഹിം, പി.കെ അസ്മത്ത്, എം.സി സെബാസ്റ്റ്യന്‍, സന്തോഷ്‌കുമാര്‍, ടി.കെ ഭൂപേഷ്, ബെന്നി അരിഞ്ചേര്‍മല, സിനോ പാറക്കാലായില്‍, വി ഉമ്മര്‍ എന്നിവര്‍ വാര്‍ത്താസമ്മേളനത്തില്‍ പറഞ്ഞു.