വാഷിങ്ടണ്‍: അന്താരാഷ്ട്ര ബഹിരാകാശ നിലയത്തില്‍ അജ്ഞാത വസ്തു ഇടിച്ച് വിള്ളല്‍ വീണു. കഴിഞ്ഞ ആഴ്ചയാണ് സംഭവം. ബഹിരാകാശത്തെ ചെറിയ അവശിഷ്ടമാണ് അപകടമുണ്ടാക്കിയത്. ഈ വിവരം ബഹിരാകാശ സഞ്ചാരികള്‍ ട്വിറ്ററിലൂടെ അറിയിച്ചു. ബഹിരാകാശ കേന്ദ്രത്തിന് നിലവില്‍ ഭീഷണിയില്ലെങ്കിലും അപകടം ശാസ്ത്രജ്ഞരുടെ ആശങ്ക വര്‍ധിപ്പിച്ചിട്ടുണ്ട്.

ഏഴ് മില്ലിമീറ്റര്‍ മാത്രം വലിപ്പമുള്ളതാണ് ഈ വിള്ളല്‍. ഒരു മില്ലിമീറ്റര്‍ പോലും വലിപ്പമില്ലാത്ത തീരെ ചെറിയ വസ്തുവിന് ഇത്രയും വലിയ വിള്ളല്‍ ഉണ്ടാക്കാമെങ്കില്‍ ഒരു സെന്റീമീറ്ററെങ്കിലും വലിപ്പമുള്ള അവശിഷ്ടം ബഹിരാകാശ നിലയത്തിന്റെ പ്രവര്‍ത്തനത്തെ തന്നെ ദോഷകരമായി ബാധിച്ചേക്കുമെന്നാണ് ഇപ്പോഴത്തെ ആശങ്ക. ബഹിരാകാശ നിലയത്തിന്റെ ഒബ്‌സര്‍വേറ്ററി മൊഡ്യൂളായ ക്യൂപോല വിന്‍ഡോസിലാണ് വിള്ളല്‍ വീണത്.