നാദാപുരം: കിണറ്റില്‍ വീണ യുവാവിനെ നാട്ടുകാരും ഫയര്‍ ഫോഴ്‌സും ചേര്‍ന്നു രക്ഷിച്ചു. കസ്തൂരിക്കുളം പെട്രോള്‍പമ്പിനു സമീപം കണ്ടോത്ത് മുനീര്‍ (35) ആണ് ഇന്നലെ രാവിലെ പത്തരയോടെ വീട്ടുമുറ്റത്തെ കിണറ്റില്‍ കാല്‍വഴുതി വീണത്.
ജന്മനാ മാനസിക വൈകല്യമുള്ള യുവാവ് വീട്ടുകാരെ പേടിപ്പിക്കാന്‍ വീട്ടുമുറ്റത്തെ കിണറിന്റെ ആള്‍മറയില്‍ കയറി ഭീഷണി മുഴക്കുന്നത് പതിവായിരുന്നു.
ഇന്നലെ ഇവിടെ കയറിനില്‍ക്കാനുള്ള ശ്രമത്തിനിടെ അബദ്ധത്തില്‍ കാല്‍വഴുതി കിണറ്റിലേക്കു വീഴുകയായിരുന്നു. നാട്ടുകാര്‍ ഇയാളെ രക്ഷിക്കാന്‍ ശ്രമം നടത്തിയെങ്കിലും അത് വിഫലമായതോടെ ചേലക്കാട്ടു നിന്നും ഫയര്‍ഫോഴ്‌സിനെ വിളിച്ചുവരുത്തി.
രാംദാസ്, ദിലീപ്, ഷൈജേഷ്, രാജീവന്‍, ഫൈസല്‍, സുരേഷ്, എന്നീ ഫയര്‍ഫോഴ്‌സ് ഉദ്യോഗസ്ഥരും നാട്ടുകാരും ചേര്‍ന്നാണ് ഇയാളെ രക്ഷിച്ചത്. കല്ലാച്ചി സ്വകാര്യ ആശുപത്രിയില്‍ ചികിത്സ നല്‍കി.