കണ്ണൂര്‍: നഗരത്തില്‍ കെ.എം.സി നമ്പര്‍ ഇല്ലാതെ ഓട്ടോകള്‍ സര്‍വിസ് നടത്തുന്നതില്‍ പ്രതിഷേധിച്ച് ഓട്ടോതൊഴിലാളി യൂനിയന്റെ നേതൃത്വത്തില്‍ ആര്‍.ടി.ഒയെ ഉപരോധിച്ചു. ഇന്നലെ രാവിലെ 11ഓടെയാണ് തൊഴിലാളികള്‍ ആര്‍.ടി.ഒ മോഹനന്‍ നമ്പ്യാരെ ഓഫിസിലെ കാബിനിലെത്തി ഉപരോധിച്ചത്. അനധികൃത സര്‍വിസ് നടത്തുന്നതുമായി ബന്ധപ്പെട്ട് പലതവണ പരാതി നല്‍കിയിട്ടും അധികൃതര്‍ നടപടിയെടുത്തിട്ടില്ല. പല ഓട്ടോകള്‍ക്കും ഫിറ്റ്‌നസ് സര്‍ട്ടിഫിക്കറ്റ് നല്‍കുന്നുണ്ടെന്ന് തൊഴിലാളികള്‍ ആരോപിച്ചു. ഒരേ കെ.എം.സി നമ്പറില്‍ സര്‍വിസ് നടത്തുന്ന ഓട്ടോകള്‍ക്കെതിരേ നടപടിയെടുക്കാന്‍ ജോയിന്റ് ആര്‍.ടി.ഒയെ നിയോഗിക്കുമെന്ന ഉറപ്പിന്‍മേല്‍ ഉപരോധം അവസാനിപ്പിച്ചു. അടുത്ത ആര്‍.ടി.എ യോഗത്തില്‍ വിഷയം അജണ്ടയായി ചര്‍ച്ച ചെയ്യുമെന്നും അനധികൃത സര്‍വിസ് പിടികൂടുമെന്നും ആര്‍.ടി.ഒ യൂനിയന്‍ നേതാക്കളെ അറിയിച്ചു. ഓട്ടോതൊഴിലാളി യൂനിയന്‍ സി.ഐ.ടി.യു ഏരിയ സെക്രട്ടറി എ.വി പ്രകാശന്‍, മോട്ടോര്‍ തൊഴിലാളി കോണ്‍ഫെഡറേഷന്‍ സെക്രട്ടറി കെ ദയരാജന്‍, എന്‍ അജിത്ത് എന്നിവര്‍ നേതൃത്വം നല്‍കി.