കല്‍പ്പറ്റ: വോട്ടുചെയ്യാനുള്ള നീണ്ട വരി ഈ ബൂത്തുകളില്‍ കാണാന്‍ കഴിയില്ല. കാരണം മറ്റൊന്നുമല്ല, കാത്തിരിക്കാന്‍ ഇരിപ്പിടങ്ങള്‍ ഒരുക്കിയിട്ടുണ്ട്. ഇത് ജില്ലയിലെ മാതൃകാ പോളിങ് ബൂത്തുകളിലെ കാഴ്ച. വോട്ടര്‍മാര്‍ക്കായി പന്തലിട്ട് അതില്‍ കസേരകളും കുടിക്കാന്‍ വെള്ളവും ബിസ്‌കറ്റും ഇവിടെ ഒരുക്കിയിട്ടുണ്ട്. ഇവ സ്ത്രീ സൗഹൃദവും വികലാംഗ സൗഹൃദവുമാണ്. വികലാംഗര്‍ക്കായി വീല്‍ചെയറും ഒരുക്കിയിരുന്നു. കസേരകളില്‍ കാത്തിരിക്കുന്നവര്‍ക്ക് ടോക്കണ്‍ നല്‍കും. അത് പ്രകാരം വിളിക്കും.
മുതിര്‍ന്നവര്‍ക്ക് കാത്തിരിക്കുകയും വേണ്ട. നേരെ വോട്ട് ചെയ്ത് മടങ്ങാം. മാതൃകാ പോളിങ് സ്‌റ്റേഷനുകളില്‍ വോട്ടര്‍മാരെ അഥിതികാളായി സ്വീകരിച്ച് മുട്ടിലിലെ വ്യവസായ കേന്ദ്രത്തിലൊരുക്കിയ പോളിങ് സ്‌റ്റേഷന്‍ ഏവരുടെയും പ്രശംസ പിടിച്ചുപറ്റി. മനോഹരമായി പന്തലിട്ട് വോട്ടര്‍മാര്‍ക്ക് ആവശ്യമായ സൗകര്യങ്ങളൊരുക്കിയായിരുന്നു ഇവിടുത്തെ പോളിങ് സ്‌റ്റേഷന്‍. ബൂത്ത് ലെവര്‍ ഓഫിസര്‍ പി.എ വിമലയുടെ നേതൃത്വത്തിലുള്ള ഉദ്യോഗസ്ഥരാണ് ഇവിടെ പ്രവര്‍ത്തനങ്ങള്‍ക്ക് ചുക്കാന്‍ പിടിച്ചത്. കഴിഞ്ഞ ലോക്‌സഭാ തെരഞ്ഞെടുപ്പില്‍ പോളിങ് ശതമാനം കുറഞ്ഞ 47 ബൂത്തുകളാണ് മാതൃകാ ബൂത്തുകളായി സജ്ജീകരിച്ചത്. ഇവിടങ്ങളില്‍ വോട്ട് ചെയ്തവര്‍ക്കെല്ലാം ഓര്‍മ മരത്തെകളും നല്‍കി.