തിരുവനന്തപുരം: പാവപ്പെട്ടവന്‍ ബില്ലടച്ചില്ലെങ്കില്‍ കുടിവെള്ള പൈപ്പ് ലൈന്‍ കട്ട് ചെയ്യുന്ന ജലഅതോറിറ്റി മാസം തോറും സര്‍ക്കാര്‍ ഖജനാവില്‍ നിന്നു ചോര്‍ത്തുന്നത് 20 കോടിയിലധികം രൂപ. വെള്ളക്കരം കൊടുക്കാതെ വന്‍കിട സ്ഥാനങ്ങളും ഫ്‌ളാറ്റുകളും ആശുപത്രികളും സര്‍ക്കാര്‍ സ്ഥാപനങ്ങളും വരെ അതോറിറ്റിയെ പറ്റിക്കുന്നുണ്ട്.
എന്നാല്‍ ബില്ല് അടച്ചില്ലെങ്കില്‍ ഇവര്‍ക്കെതിരെ ഒരു നടപടിയും സ്വീകരിക്കാറുമില്ല. ഏതാണ്ട് 800 കോടിയോളം രൂപയാണ് വെള്ളക്കരത്തിന് പിരിഞ്ഞു കിട്ടാനുള്ളത്. അടുത്ത അഞ്ചു വര്‍ഷത്തിനുള്ളില്‍ എല്ലാ വീടുകളിലും കുടിവെള്ള പൈപ്പ് ലൈന്‍ നല്‍കുമെന്ന് വീമ്പു പറയുന്ന സര്‍ക്കാരും ഭരണത്തിലേറി നൂറു ദിവസം പിന്നിട്ടിട്ടും ഒരു നടപടിയുമില്ല.
വന്‍ നഷ്ടത്തിലൂടെയാണ് ഓരോ സാമ്പത്തിക വര്‍ഷവും ജല അതോറിറ്റി കടന്നു പോകുന്നത്. 2015 വരെ 2620.39 കോടിയായിരുന്നു നഷ്ടം. 2016 മാര്‍ച്ച് വരെ മാത്രം നഷ്ടം 168 കോടി രൂപ. ഒരു മാസം 20 കോടിയുടെ നഷ്ടം. 2015-16ലെ അതോറിറ്റിയുടെ വരുമാനം 848.12 കോടി രൂപ ഇതേ വര്‍ഷം ചെലവ് 1016.13 കോടി രൂപയാണ്. കരാറുകാര്‍ക്കു നല്‍കാനുള്ള തുക വേറെ.
ഉല്‍പാദന ചെലവ് കൂടുതലും വരുമാനം കുറവുമാണ് അതോറിറ്റിയുടെ ശാപം. അടിക്കടിയുള്ള പൈപ്പുപൊട്ടലും അറ്റകുറ്റ പണികളും മൂലമുള്ള ബാധ്യതയും അതോറിറ്റിയെ വെള്ളം കുടിപ്പിയ്ക്കുന്നു.
പൊതുമരാമത്ത് വകുപ്പില്‍ നിന്നു മാറി കേരള ജല അതോറിറ്റി രൂപം കൊള്ളുന്നത് 1984 ലാണ്. എന്നും നഷ്ടക്കണക്ക് മാത്രം. കുടിശ്ശിക പിരിച്ചെടുക്കാന്‍ തലപ്പത്തുള്ളവര്‍ താത്പര്യം കാട്ടിയിട്ടില്ല. പൈപ്പ് പൊട്ടലിന്റെയും കരാറുകളുടെയും മറവില്‍ നടക്കുന്നതും പെരുംകൊള്ളയാണ്.
ഒരു കുടിവെള്ള നയം പോലും ആവിഷ്‌കരിക്കാത്ത സര്‍ക്കാരുകള്‍ അതോറിറ്റിയെ കരകയറ്റാനും ശ്രമിച്ചിട്ടില്ല. കുടിശ്ശിക പിരിച്ചെടുക്കാന്‍ ആവശ്യത്തിന് ജീവനക്കാരില്ലെന്നാണ് ഉദ്യോഗസ്ഥരുടെ നിലപാട്.
കേന്ദ്ര ഫണ്ട് ഗണ്യമായി കുറച്ചുവെന്നും പുതിയ പദ്ധതികള്‍ക്ക് റോഡ് കട്ടിങിന് അനുമതി വൈകുന്നുവെന്നും, പദ്ധതിത്തുകയുടെ 40 ശതമാനത്തോളം റോഡ് കട്ടിങിന് അടയ്‌ക്കേണ്ടിവരുന്നുവെന്നും അവര്‍ പറയുന്നു. റെയില്‍വേ ലൈനുകള്‍ മറികടന്ന് പൈപ്പിടാന്‍ അനുമതിക്ക് മൂന്നു വര്‍ഷം വരെ കാക്കണം. അതോറിറ്റി തുടങ്ങിയ കാലത്തെ സ്റ്റാഫ് പാറ്റേണ്‍ തന്നെയാണ് ഇപ്പോഴും നിലനില്‍ക്കുന്നതെന്നും ഉദ്യോഗസ്ഥര്‍ ചൂണ്ടിക്കാട്ടുന്നു.
എന്നാല്‍ വര്‍ഷം തോറും കുടിശ്ശിക കൂടികൂടി വരികയാണ്. 2011-16 കാലയളവില്‍ തദ്ദേശ സ്ഥാപനങ്ങള്‍ 542.59 കോടിയും,സര്‍ക്കാര്‍ സ്ഥാപനങ്ങള്‍ 70.79 കോടിയും, അര്‍ധസര്‍ക്കാര്‍ സ്ഥാപനങ്ങള്‍ 10.14 കോടിയും, സ്വകാര്യ വ്യക്തികള്‍ 4.67 കോടിയുമാണ്  കുടിശ്ശിക വരുത്തിയിട്ടുള്ളത്.