തിരുവനന്തപുരം: സംസ്ഥാനത്തെ നിയമസഭാ മണ്ഡലങ്ങളിലെ വോട്ടര്‍പട്ടിക തെരഞ്ഞെടുപ്പ് കമ്മിഷന്‍ പുതുക്കുന്നു. ഇതിന്റെ ഭാഗമായി കരട് വോട്ടര്‍പട്ടിക ഇന്ന് പ്രസിദ്ധപ്പെടുത്തും. മുഖ്യ തെരഞ്ഞെടുപ്പ് ഓഫിസറുടെ വെബ്‌സൈറ്റിലും ജില്ലാ കലക്ടറേറ്റ്, താലൂക്ക് ഓഫിസുകള്‍ എന്നിവിടങ്ങളിലെ തെരഞ്ഞെടുക്കപ്പെട്ട വിഭാഗങ്ങളിലും അച്ചടിച്ച കരട് പട്ടിക പൊതുജനങ്ങള്‍ക്ക് പരിശോധിക്കാനായി പ്രസിദ്ധപ്പെടുത്തും.
ബൂത്തുതല ഉദ്യോഗസ്ഥരുടെ പക്കലും അച്ചടിച്ച കരട് പട്ടിക ലഭ്യമാക്കും. കരട് പട്ടികയുടെ പകര്‍പ്പ് അടങ്ങിയ സി.ഡികള്‍ സംസ്ഥാനത്തെ എല്ലാ അംഗീകൃത ദേശീയ, സംസ്ഥാന രാഷ്ട്രീയപ്പാര്‍ട്ടികള്‍ക്കും നല്‍കിയിട്ടുണ്ട്. 2017 ജനുവരി ഒന്നിനോ അതിനു മുന്‍പോ 18 വയസ്സ് പൂര്‍ത്തിയാകുന്നവര്‍ക്ക് വോട്ടര്‍പട്ടികയില്‍ പേരു ചേര്‍ക്കാന്‍ അപേക്ഷിക്കാം.
അപേക്ഷകള്‍ മുഖ്യ തെരഞ്ഞെടുപ്പ് ഓഫിസറുടെ വെബ്‌സൈറ്റ് വഴി ഓണ്‍ലൈനായി സമര്‍പ്പിക്കണം. അക്ഷയ കേന്ദ്രങ്ങള്‍ വഴി സമര്‍പ്പിക്കുന്നതിന് 25 രൂപ സര്‍വിസ് ഫീസായി നല്‍കണം. 2016 ഒക്ടോബര്‍ 31 മുതല്‍ നവംബര്‍ 30 വരെ അപേക്ഷ സ്വീകരിക്കും.
സ്ഥലം മാറി പേര് ചേര്‍ക്കാനും പട്ടികയില്‍ നിലവിലുള്ള വോട്ടര്‍മാരുടെ വിവരങ്ങളില്‍ എന്തെങ്കിലും തെറ്റുണ്ടെങ്കില്‍ തിരുത്താനും അവസരമുണ്ടാകും. 2017 ജനുവരി 14ന് അന്തിമ വോട്ടര്‍പട്ടിക പ്രസിദ്ധീകരിക്കും.