മലപ്പുറം: രാജ്യത്ത് ഏക സിവില്‍കോഡ് നടപ്പാക്കിയാലും ലിംഗനീതി ഉണ്ടാകില്ലെന്ന് കവി സച്ചിദാനന്ദന്‍. ഇസ്്‌ലാം ഭീതിയുടെ വര്‍ത്തമാനം എന്ന പ്രമേയത്തില്‍ പിറ്റ്‌സ (പ്ലാറ്റ്‌ഫോം ഫോര്‍ ഇന്നവേറ്റീവ് തോട്‌സ് ആന്‍ഡ് സോഷ്യല്‍ ആക്ഷന്‍) മലപ്പുറത്ത് സംഘടിപ്പിച്ച ദ്വിദിന ദേശീയ സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം.
സ്ത്രീ-പുരുഷ വിവേചനം ഇല്ലാതാക്കാന്‍കൂടിയാണ് ഏകീകൃത വ്യക്തിനിയമം കൊണ്ടുവരുന്നതെന്നാണ് കേന്ദ്ര സര്‍ക്കാര്‍ വാദിക്കുന്നത്.
എന്നാല്‍ ഇത് രാജ്യത്തെ ബഹുസ്വരതകളെ ഇല്ലാതാക്കുകയാണ് ചെയ്യുക. ലിംഗവിവേചനം ഒരു പ്രത്യേക മതത്തില്‍മാത്രം ഒതുങ്ങുന്നതല്ലെന്നും നിലവിലുള്ള വ്യക്തി നിയമം ഇല്ലാതാക്കുന്നതിനു പകരം പരിഷ്‌കാരങ്ങള്‍ കൊണ്ടു വരികയാണ് വേണ്ടതെന്നും അദ്ദേഹം പറഞ്ഞു.
ജാതി വ്യവസ്ഥ നിലനില്‍ക്കുന്നതും ഏറ്റവും കൂടുതല്‍ വിവാഹമോചനം നടക്കുന്നതും  ബഹുഭാര്യത്വം കൂടുതലുള്ളതും ഇസ്്‌ലാമിലല്ലെന്നും അദ്ദേഹം പറഞ്ഞു.
ഒരു സമുദായത്തെ സാമൂഹിക വൃത്തത്തില്‍നിന്നു പുറത്താക്കുന്ന സാമൂഹികപരമായ ആശങ്കയാണ് ഇസ്‌ലാം ഭീതിയെന്നും അത് അപകടകരമാണെന്നും ചടങ്ങില്‍ അധ്യക്ഷനായ പാണക്കാട് സയ്യിദ് മുനവ്വറലി ശിഹാബ് തങ്ങള്‍ പറഞ്ഞു.
പി.എ റഷീദ് സ്വാഗതവും എ.കെ അബ്ദുല്‍മജീദ് നന്ദിയും പറഞ്ഞു.