തൊടുപുഴ: മലങ്കര ജലാശയത്തിന് കുറുകെ പതിറ്റാണ്ടുകള്‍ പഴക്കമുള്ള പാലം പൊളിച്ച് നീക്കുന്നത് ജനപ്രതിനിധിയുടെ നേതൃത്വത്തില്‍ തടഞ്ഞു. പാലം പൊളിച്ച് നീക്കുന്നതിനിടെ സമീപത്തെ വീടിന് വിള്ളലുണ്ടായതായും പൊളിച്ച പാലത്തിന്റെ അവശിഷ്ടങ്ങള്‍ ഉടന്‍ നീക്കം ചെയ്യണമെന്നും ആവശ്യപ്പെട്ടുമാണ് മുട്ടം രണ്ടാം വാര്‍ഡ് മെമ്പര്‍ ബിജോയ് ജോണിന്റെ നേതൃത്വത്തില്‍ പാലം പൊളിക്കല്‍ തടഞ്ഞത്.
പുതിയ പാലം നിര്‍മ്മിച്ചതിനെ തുടര്‍ന്നാണ് കാലപ്പഴക്കമേറിയ പഴയപാലം പൊളിച്ചുനീക്കാന്‍ തീരുമാനിച്ചത്. പുതിയ പാലത്തിലൂടെ സഞ്ചാരം തുറന്ന് കൊടുക്കുകയും പഴയ പാലം അതേപടി തകര്‍ന്ന നിലയില്‍ മാസങ്ങളോളം ഉപയോഗ ശൂന്യമായി കിടക്കുകയുമായിരുന്നു.
എന്നാല്‍ മലങ്കര പവര്‍ ഹൗസില്‍ വൈദ്യുതി ഉല്‍പാദനത്തിന് ശേഷം പുറംതള്ളുന്ന ജലം തകര്‍ന്ന പാലത്തില്‍ തട്ടി ചുറ്റിത്തിരിയുന്നതിനാല്‍ വൈദ്യുതിയുടെ ഉല്‍പാദനത്തെ പ്രതികൂലമായി ബാധിച്ചിരുന്നു. ഇക്കാര്യങ്ങള്‍ ചൂണ്ടിക്കാട്ടി മലങ്കര പവര്‍ഹൗസ് അധികൃതര്‍ ഉന്നതതലത്തില്‍ ഇടപെട്ടതിന്റെ അടിസ്ഥാനത്തിലാണ് പാലം പൊളിച്ച് നീക്കാന്‍ അനുമതി ലഭിച്ചത്. ഇതിന്റെ ഭാഗമായി കഴിഞ്ഞ ഏതാനും ദിവസം മുമ്പ് പണികള്‍ ആരംഭിച്ചിരുന്നു. ഇന്നലെ പാലത്തിന്റെ തൂണുകള്‍ പൊളിക്കുന്നതിനായി രണ്ട് മണിക്കൂറോളം പവ്വര്‍ ഹൗസിന്റെ പ്രവര്‍ത്തനം നിര്‍ത്തിവെച്ച് പുഴയിലെ വെള്ളം വറ്റിച്ചിരുന്നു. ജലത്തിന്റെ ഒഴുക്ക് നിയന്ത്രിക്കുന്നതിനായാണ് പവ്വര്‍ ഹൗസിന്റെ പ്രവര്‍ത്തനം നിര്‍ത്തിവെച്ചത്. പണികള്‍ പുരോഗമിക്കുന്നതിനിടെയാണ് നിര്‍മ്മാണം തടഞ്ഞത്. ഏറെ സമയമെടുത്ത് ചര്‍ച്ച ചെയ്തിട്ടും പ്രശ്‌നം പരിഹരിക്കാന്‍ കഴിഞ്ഞില്ല. ഇതേ തുടര്‍ന്ന് രണ്ട് മണിക്കൂറിന് ശേഷം വൈദ്യുതി ഉല്‍പാദനം പുനരാരംഭിച്ചു.
വിള്ളലേറ്റ വീടിന്റെ ഭാഗം നിര്‍മിച്ച് നല്‍കുമെന്നും പണി പൂര്‍ത്തിയാകുന്ന മുറക്ക് അവശിഷ്ടങ്ങള്‍ നീക്കം ചെയ്യുമെന്നും എം.വി.ഐ.പി അധികൃതര്‍ അറിയിച്ചു.