തിരുവനന്തപുരം: പാര്‍ട്ടി ഗുണ്ടകളെ സംരക്ഷിക്കാന്‍ സര്‍ക്കാര്‍ ഒത്തുകളിക്കുകയാണെന്ന് പ്രതിപക്ഷനേതാവ് രമേശ് ചെന്നിത്തല. സി.പി.എം ഏരിയ സെക്രട്ടറി സക്കീര്‍ ഹുസൈന്റെ അറസ്റ്റ് വൈകുന്നതിനെതിരില്‍ പ്രതികരിക്കുകയായിരുന്നു രമേശ് ചെന്നിത്തല

സര്‍ക്കാര്‍ സംരക്ഷണത്തിലാണ് ഇപ്പോള്‍ ഗുണ്ടകളെന്നും പ്രതിപക്ഷ നേതാവ് ആരോപിച്ചു. പാര്‍ട്ടി ഗുണ്ടകളെ സംരക്ഷിക്കാന്‍ സര്‍ക്കാര്‍ ഒത്തുകളിക്കുകയാണെന്നും അതിന് തെളിവാണ് സക്കീര്‍ ഹുസൈന്റെ അറസ്റ്റ് വൈകുന്നതെന്നും ചെന്നിത്തല പറഞ്ഞു.

വ്യവസായിയെ തട്ടിക്കൊണ്ടുപോയി ഭീഷണിപ്പെടുത്തിയെന്ന കേസില്‍ പ്രതിയായ സി.പി.എം കളമശ്ശേരി ഏരിയ സെക്രട്ടറിയായ സക്കീര്‍ ഹുസൈനെ ഇതുവരെ പൊലിസ് അറസ്റ്റ് ചെയ്തിട്ടില്ല.

കേസില്‍ സക്കീറിനെ ഒന്നാം പ്രതിയാക്കിയാണ് എഫ്.ഐ.ആര്‍ രജിസ്റ്റര്‍ ചെയ്തിരിക്കുന്നത്. കേസില്‍ സക്കീര്‍ നല്‍കിയ മുന്‍കൂര്‍ ജാമ്യാപേക്ഷ നാളെ കോടതി പരിഗണിക്കും. ഗൂഢാലോചന, തട്ടിക്കൊണ്ടുപോകല്‍, തുടങ്ങിയവയുള്‍പ്പെടെ ഏഴു വകുപ്പുകള്‍ ചേര്‍ത്താണ് എഫ്.ഐ.ആര്‍ രജിസ്റ്റര്‍ ചെയ്തിരിക്കുന്നത്.