ന്യൂഡല്‍ഹി: ഓള്‍ റൗണ്ടര്‍ അക്‌സര്‍ പട്ടേലിനു ഏകദിന റാങ്കിങില്‍ മുന്നേറ്റം. ആദ്യ പത്തിനുള്ളില്‍ ഇടം പിടിച്ച ഏക ഇന്ത്യന്‍ ബൗളറാണ് നിലവില്‍ അക്‌സര്‍. ഏറ്റവും പുതിയ റാങ്കിങ് പ്രകാരം അക്‌സര്‍ ഒന്‍പതാം സ്ഥാനത്ത്.
അഞ്ചു വിക്കറ്റ് വീഴ്ത്തി ഇന്ത്യക്ക് ഏകദിന പരമ്പര സമ്മാനിച്ച അമിത് മിശ്ര ഒറ്റയടിക്ക് 25 സ്ഥാനങ്ങള്‍ മെച്ചപ്പെടുത്തി കരിയറിലാദ്യമായി 20ല്‍ താഴെ റാങ്കിലെത്തി. 12ാം സ്ഥാനത്താണ് മിശ്രയിപ്പോള്‍. ഉമേഷ് യാദവ് 35ാം റാങ്കിലും ബുമ്‌റ 57ാം റാങ്കിലുമെത്തി നില മെച്ചപ്പെടുത്തി.
ബൗളര്‍മാര്‍ നില മെച്ചപ്പെടുത്തിയപ്പോള്‍ ബാറ്റ്‌സ്മാന്‍മാരായ രോഹിത് ശര്‍മയ്ക്കും അജിന്‍ക്യ രഹാനെയ്ക്കും രണ്ടു സ്ഥാനങ്ങള്‍ നഷ്ടമായി. രോഹിത് ഒന്‍പതാം റാങ്കിലും രഹാനെ 20ാം റാങ്കിലും. വിരാട് കോഹ്‌ലി രണ്ടാം റാങ്കില്‍.