ശ്രീനഗര്‍: ജമ്മു കശ്മിരിലെ കുപ്‌വാര ജില്ലയില്‍ സൈന്യവും ഭീകരരും തമ്മില്‍ ഏറ്റുമുട്ടല്‍. കുപ്‌വാരയിലെ വനപ്രദേശമായ കന്ധിയിലാണ് ഏറ്റുമുട്ടലുണ്ടായത്. മൂന്നു ഭീകരര്‍ പ്രദേശത്ത് കടന്നു കയറിയെന്ന റിപ്പോര്‍ട്ടുകളെ തുടര്‍ന്നാണ് സൈന്യത്തിന്റെയും പൊലിസിന്റെയും സംയുക്ത പരിശോധന നടന്നത്.   തിരച്ചില്‍ നടത്തുന്നതിനിടെയാണ് ഏറ്റുമുട്ടലുണ്ടായത്. ഇവിടെ നിന്നും വെടിയൊച്ച കേട്ടതായി റിപ്പോര്‍ട്ടുകളുണ്ട്. അതിര്‍ത്തിയില്‍ വെടിനിര്‍ത്തല്‍ കരാര്‍ നിരന്തരമായി ലംഘിച്ച പാകിസ്താന്‍ ഭീകര്‍ക്ക് ഇന്ത്യയിലേക്ക് കടക്കാനുള്ള വഴിയൊരുക്കുകയാണ് ചെയ്യുന്നത്. 45 ഓളം വെടിനിര്‍ത്തല്‍ ലംഘനങ്ങളാണ് പാക് സൈന്യം ഈയിടെയായി നടത്തിയത്. അതിനിടെ പാക് ഭീകരര്‍ കൊലപ്പെടുത്തി മൃതദേഹം വികൃതമാക്കിയ വീരസൈനികന്‍ മന്‍ദീപ് സിങിന്റെ ഭൗതികദേഹം ഹരിയാനയിലെ കുരുക്ഷേത്രയില്‍ സംസ്‌കരിച്ചു.