അങ്ങാടിപ്പുറം: വളാഞ്ചേരി കോട്ടക്കല്‍ റോഡുകള്‍ വന്നു ചേരുന്ന വൈലോങ്ങര ജങ്ഷനില്‍ അപകടങ്ങള്‍ പതിവാകുന്നു. വാഹന സൗകര്യം അധികരിച്ചതോടെ ജങ്ഷനില്‍ വാഹനാപകടങ്ങളും വര്‍ധിക്കുകയുണ്ടായി.
വീതി കുറഞ്ഞ റോഡില്‍ പ്രദേശത്ത് മൂന്നിടങ്ങളിലേക്കുള്ള ബസ് കാത്തിരിപ്പ് കേന്ദ്രവുമുണ്ട്. രണ്ടുബസുകള്‍ നടു റോഡില്‍ നിര്‍ത്തിയിടുന്നതോടെ പുറകിലെ വാഹനങ്ങള്‍ മുന്‍പിലെ വാഹനങ്ങള്‍ നീങ്ങുന്നത് വരെ കാത്തുനില്‍ക്കണം.
ഇന്നലെ രാവിലെ 8.40 ഓടെയുണ്ടായ വാഹനാപകടത്തിനും ഇതുകാരണമായി.
അങ്ങാടിപ്പുറം ഭാഗത്തു നിന്നു വന്ന ടിപ്പര്‍ ലോറി പെരിന്തല്‍മണ്ണയില്‍ നിന്നു വന്ന കെ.എസ്.ആര്‍.ടി.സി ബസിനെ മറികടക്കുന്നതിനിടെ കൊളത്തൂര്‍ ഭാഗത്തു നിന്നു വന്ന സ്വകാര്യ ബസില്‍ ഇടിക്കുകയായിരുന്നു. ഇരു വാഹനങ്ങളുടേയും മുന്‍വശം തകര്‍ന്നു. മൂന്നു റോഡുകള്‍ കൂടിച്ചേരുന്ന പ്രദേശമായതിനാല്‍ ജങ്ഷനില്‍ ഡിവൈഡര്‍ സ്ഥാപിക്കണമെന്നാവശ്യം ശക്തമാകുകയാണ്.