മലപ്പുറം: പൊന്നാനിയില്‍ വന്‍ ലഹരി വേട്ട. മാര്‍ക്കറ്റില്‍ ഏഴു ലക്ഷം രൂപ വിലയുള്ള ഹാന്‍സുകളാണ് പൊലിസ് പിടികൂടിയത്. 15 ചാക്കുകളിലായാണ് ഹാന്‍സ് സൂക്ഷിച്ചിരുന്നത്.
സംഭവത്തില്‍ വെളിയങ്കോട് പഴഞ്ഞി സ്വദേശി മനകടവത്ത് ഷൗക്കത്ത് അലി (32) എന്നയാളെ പൊന്നാനി അഡീഷണല്‍ എസ്.ഐ. ശ്രീജേഷ് പിടികൂടി.
പുഴമ്പ്രം സെന്ററിലുള്ള ഇയാളുടെ ഭാര്യവീട്ടില്‍ നിന്നുമാണ് 15 ചാക്ക് ഹാന്‍സ് പിടികൂടിയത്.
കോയമ്പത്തൂരില്‍ നിന്നും പച്ചക്കറി വണ്ടിയില്‍ പച്ചക്കറിയോടൊപ്പം ആണ് ഇയാള്‍ ഹാന്‍സ് കൊണ്ടുവരുന്നത്. പൊന്നാനിക്ക് പുറമെ തൃശ്ശൂരിലും കുന്നംകുളത്തും ചെറുകിട വില്‍പനക്കാര്‍ക്കും സാധനങ്ങള്‍ എത്തിച്ചു കൊടുക്കുന്നത് ഷൗക്കത്ത് അലിയാണ്.
കൂടാതെ പൊന്നാനി കൊല്ലന്‍പടിയിലുള്ള കടവനാട് വാരിയത്പടി സ്വദേശി മനയില്‍ മോഹനന്‍ എന്നയാളുടെ കടയില്‍ നിന്നും വില്‍പ്പനയ്ക്കായി സൂക്ഷിച്ച ഹാന്‍സും പൊലിസ് പിടികൂടിയിട്ടുണ്ട്.
സിവില്‍ പൊലിസ് ഓഫിസര്‍മാരായ പ്രദീപ്, സനോജ്, രഞ്ജിത്ത്, മുകേഷ് എന്നിവരാണ് സംഘത്തിലുണ്ടായിരുന്നത്.