തൃശൂര്‍: സൈ്വര്യജീവിതത്തിന് ഭംഗം വരുത്തുന്ന ഗുണ്ടാ മാഫിയ സംഘങ്ങളെ അമര്‍ച്ച ചെയ്യാനുളള ശക്തമായ നടപടികള്‍ പൊലിസ് സേന ആരംഭിച്ചതായി മുഖ്യമന്ത്രി പിണറായി വിജയന്‍ പറഞ്ഞു.
തൃശൂര്‍ രാമവര്‍മപുരം പൊലിസ് അക്കാദമിയില്‍ പരിശീലനം പൂര്‍ത്തിയാക്കിയ പൊലിസ് സേനാംഗങ്ങളുടെ പാസിംഗ് ഔട്ട് പരേഡില്‍  അഭിവാദ്യം സ്വീകരിച്ചു സംസാരിക്കുകയായിരുന്നു അദ്ദേഹം. മര്യാദയോടെ, മാന്യമായി പെരുമാറുകയും അഴിമതിക്ക് വശംവദരാകാതിരിക്കുകയുമാണ് പൊലിസ് സേനാംഗങ്ങളുടെ കടമ. ഇങ്ങനെയുളള സേനാംഗങ്ങള്‍ പൊലിസ് സേനയുടെ അഭിമാനമാണ്. എന്നാല്‍ അങ്ങിനെ അല്ലാത്തവരുമുണ്ട്. അവരെക്കുറിച്ച് നിരവധി പരാതികളുമുണ്ട്. അഴിമതിരഹിത പ്രവര്‍ത്തനങ്ങള്‍ ശരിയായി നടത്തുമ്പോള്‍ അതിനു തടസം നില്‍ക്കുന്നവരെ അഴിമതിക്ക് കൂട്ടുനില്‍ക്കുന്നവരായേ കണാനാവൂ. അത്തരക്കാരോടു സര്‍ക്കാരിന് മ്യദുസമീപനം ഇല്ലെന്നും മുഖ്യമന്ത്രി പറഞ്ഞു.

 കേരള ആംഡ് പൊലിസ് ഒന്ന്, രണ്ട്, അഞ്ച് ബാറ്റാലിയനുകളില്‍ നിന്നും ഇന്ത്യന്‍ റിസര്‍വ് ബറ്റാലിയനില്‍ നിന്നും പരിശീലനം പൂര്‍ത്തിയാക്കിയ 464 അംഗങ്ങള്‍ രാമവര്‍മപുരം കേരള പൊലിസ് അക്കാദമി പരേഡ് ഗ്രൗണ്ടിലെ പാസിംഗ് ഔട്ട് പരേഡില്‍ പങ്കെടുത്തു.
സംസ്ഥാന പൊലിസ് മേധാവി ലോക്‌നാഥ് ബെഹ്‌റ, ആംഡ് പൊലിസ് ബറ്റാലിയന്‍ എ.ഡി.ജി.പി നിതിന്‍ അഗര്‍വാള്‍, ട്രെയിനിങ് ഐ.ജി.പി മഹിപാല്‍ യാദവ്, ട്രെയിനിങ് ഡി.ഐ.ജി പി.വിജയന്‍, മേയര്‍ അജിത ജയരാജന്‍, കൗണ്‍സിലര്‍ വി.കെ സുരേഷ് കുമാര്‍ തുടങ്ങിയവര്‍ സംബന്ധിച്ചു. 62 ബിരുദാനന്തര ബിരുദധാരികള്‍, 204 ബിരുദധാരികള്‍, 12 എന്‍ജിനിയറിങ് ബിരുദധാരികള്‍, ഒരു പി.എച്ച്.ഡി ബിരുദധാരി എന്നിവര്‍ പരിശീലനം പൂര്‍ത്തിയാക്കിയവരില്‍ ഉള്‍പ്പെടുന്നു. പരിശീലന കാലയളവില്‍ മികച്ച ഷൂട്ടര്‍മാരായി എം.എസ് ഹരീഷ് കുമാര്‍, പി.എസ് ശ്യാം, കെ.പി അശോക് കുമാര്‍ എന്നിവരെയും ബെസ്റ്റ് ഓള്‍ റൗണ്ടര്‍മാരായി പി.എസ് ശങ്കര്‍, പ്രശാന്ത് സോമന്‍, എം.നവീന്‍ എന്നിവരേയും തെരഞ്ഞെടുത്തു. ഇവര്‍ക്കും വിവിധ പ്ലാറ്റൂണ്‍കള്‍ക്കും മുഖ്യമന്ത്രി പിണറായി വിജയന്‍ ട്രോഫികള്‍ സമ്മാനിച്ചു.

  കെ.എ.പി ഒന്നാം ബറ്റാലിയിലെ 102 പേര്‍ തൃശൂര്‍ രാമവര്‍മപുരം ആസ്ഥാനത്തും 115 പേര്‍ പാലക്കാട് ജില്ലയില്‍ മുട്ടികുളങ്ങരയിലുളള കെ.എ.പി.രണ്ടാം ബറ്റാലിയന്‍ ആസ്ഥാനത്തും കെ.എ.പി അഞ്ചാം ബറ്റാലിയനിലെ 179 പേര്‍, പത്തനംതിട്ടയിലെ മണിയാര്‍ പരിശീലന കേന്ദ്രത്തിലും ആണ് ഒന്‍പത് മാസത്തെ പരിശീനം പൂര്‍ത്തിയാക്കിയത്. കൂടാതെ ഇന്ത്യന്‍ റിസര്‍വ് ബറ്റാലിയനിലെ 68 പരിശീലനാര്‍ഥികള്‍ക്ക് പാണ്ടിക്കാട് ഇന്ത്യന്‍ റിസര്‍വ് ബറ്റാലിയനിലായിരുന്നു 18 മാസത്തെ പരിശീലനം.