ന്യൂഡല്‍ഹി: രാജ്യത്തെ കോടതികള്‍ ഇന്ന് അഭിമുഖീകരിക്കുന്ന അധികഭാരം കുറക്കുമെന്നു പ്രധാനമന്ത്രി നരേന്ദ്ര മോദി. കോടതികളില്‍ ഏറ്റവും കൂടുതല്‍ കേസുകള്‍ നടത്തുന്നതു സര്‍ക്കാരാണ്. ജുഡീഷ്യറിയുടെ അധിക സമയവും ചെലവഴിക്കുന്നതു സര്‍ക്കാര്‍ കേസുകള്‍ക്കാണെന്നും പ്രധാനമന്ത്രി ചൂണ്ടിക്കാട്ടി.
ഡല്‍ഹി ഹൈക്കോടതിയുടെ സുവര്‍ണ ജൂബിലി ആഘോഷം ഉദ്ഘാടനം ചെയ്തു സംസാരിക്കുകയായിരുന്നു നരേന്ദ്ര മോദി. ഇന്ത്യന്‍ അഡ്മിനിസ്‌ട്രേറ്റിവ് മാതൃകയില്‍ ഓള്‍ ഇന്ത്യാ ജുഡീഷ്യല്‍ സര്‍വിസ് രൂപീകരിക്കും. ജുഡീഷ്യറിയുടെ ഏറ്റവും കൂടുതല്‍ സമയം ചെലവഴിക്കുന്നതു സര്‍ക്കാര്‍ കേസുകള്‍ക്കായതുകൊണ്ടു വലിയ പ്രതിസന്ധിയാണു കോടതികള്‍ അഭിമുഖീകരിക്കുന്നത്. ഈ പ്രശ്‌നം പരിഹരിക്കാന്‍ സംയുക്തമായ പ്രവര്‍ത്തനങ്ങള്‍ അനിവാര്യമാണ്.
വലിയ പ്രതിസന്ധികളും വെല്ലുവിളികളുമാണു കോടതികള്‍ അഭിമുഖീകരിക്കുന്നത്. ഈ സാഹചര്യത്തില്‍ നമ്മുടെ കഴിവുകള്‍ പരമാവധി ഉപയോഗപ്പെടുത്തി അതിനെ അതിജീവിക്കുകയാണു വേണ്ടത്. ഇതിനു സംയുക്തമായ പ്രവര്‍ത്തനങ്ങള്‍ വേണം.
ഇത്തരം പ്രവര്‍ത്തനങ്ങളിലൂടെ നീതിന്യായ കോടതികള്‍ നേരിടുന്ന പ്രശ്‌നങ്ങള്‍ പരിഹരിക്കാന്‍ കഴിയും.
ഓരോ കേസുകളും സൂക്ഷ്മമായ പരിശോധനകള്‍ക്കു ശേഷം ഫയല്‍ ചെയ്താല്‍ കോടതിയുടെ അധികഭാരം കുറക്കാനാകുമെന്നും പ്രധാനമന്ത്രി കൂട്ടിച്ചേര്‍ത്തു.