മെക്‌സിക്കോ സിറ്റി: ഫോര്‍മുല വണ്‍ മെക്‌സിക്കന്‍ ഗ്രാന്‍ പ്രി പോരാട്ടത്തില്‍ മെഴ്‌സിഡസിന്റെ ബ്രിട്ടീഷ് ഡ്രൈവര്‍ ലൂയീസ് ഹാമില്‍ട്ടന്‍ ജേതാവ്. ദിവസങ്ങള്‍ക്കു മുന്‍പ് യു.എസ്.എ ഗ്രാന്‍ പ്രിയില്‍ കിരീടം നേടിയ ഹാമില്‍ട്ടന്‍ മെക്‌സിക്കോയിലും നേട്ടം ആവര്‍ത്തിച്ച് ഡ്രൈവര്‍മാരുടെ ലോക ചാംപ്യന്‍ പട്ടത്തിനുള്ള സാധ്യത കൂടുതല്‍ സജീവമാക്കി. നിലവില്‍ ഒന്നാം സ്ഥാനത്തുള്ള മെഴ്‌സിഡസിലെ സഹ താരം നിക്കോ റോസ്ബര്‍ഗുമായുള്ള പോയിന്റ് വ്യത്യാസം 19ആക്കി കുറയ്ക്കാനും താരത്തിനായി. റോസ്ബര്‍ഗിനു 349 പോയിന്റും രണ്ടാമതുള്ള ഹാമില്‍ട്ടനു 330 പോയിന്റുകളും. സീസണില്‍ ഇനി  ബ്രസീല്‍, അബൂദബി ഗ്രാന്‍ പ്രി പോരാട്ടങ്ങളാണ് ബാക്കിയുള്ളത്. വരാനിരിക്കുന്ന രണ്ടു പോരാട്ടങ്ങളും ഇരു ഡ്രൈവര്‍മാര്‍ക്കും നിര്‍ണായകം.  
മെഴ്‌സിഡസിന്റെ നിക്കോ റോസ്ബര്‍ഗ് രണ്ടാം സ്ഥാനത്തും റെഡ് ബുള്‍ താരങ്ങളായ ഡാനിയല്‍ റിക്കിയാര്‍ഡോ മൂന്നാം സ്ഥാനത്തും മാക്‌സ് വെര്‍സ്റ്റപ്പന്‍ നാലാം സ്ഥാനത്തമെത്തി. ഫെരാരിയുടെ സെബാസ്റ്റ്യന്‍ വെറ്റല്‍ അഞ്ചാം സ്ഥാനത്തും കിമി റൈക്കോണന്‍ ആറാമതും ഫിനിഷ് ചെയ്തു. ഫോഴ്‌സ് ഇന്ത്യയുടെ നിക്കോ ഹള്‍ക്കന്‍ബര്‍ഗ് ഏഴാം സ്ഥാനത്തും മറ്റൊരു താരമായ സെര്‍ജിയോ പെരസ് പത്താമതുമെത്തി.