കണ്ണൂര്‍: ഒരുസംഘം പൊലിസ് ഉദ്യോഗസ്ഥര്‍ സി.പി.എമ്മിന്റെ ബിനാമികളായി മാറുന്നുവെന്ന് ബി.ജെ.പി ജില്ലാ പ്രസിഡന്റ് പി സത്യപ്രകാശ് ആരോപിച്ചു. പലതവണ സി.പി.എം അക്രമത്തിന് വിധേയനായി അംഗവൈകല്യംവന്നു കിടപ്പിലായ കതിരൂര്‍ നായനാര്‍ റോഡിലെ കുറ്റിയാടന്‍ ബിജുവിനെ പൊലിസിനെതിരേ അക്രമം നടന്നെന്ന വ്യാജ പ്രചാരണം നടത്തി വീട്ടില്‍ നിന്നു കസ്റ്റഡിയിലെടുത്ത സംഭവം ഇതാണു വ്യക്തമാക്കുന്നതെന്നു സത്യപ്രകാശ് ചൂണ്ടണ്ടിക്കാട്ടി.
പൊലിസിന്റെ ക്രൂര മര്‍ദനത്തില്‍ അനങ്ങാന്‍ വയ്യാതായ ബിജു ഇപ്പോള്‍ കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. പൊലിസ് അതിക്രമത്തില്‍ ബിജുവിന്റെ അമ്മയ്ക്കും ഇളയമ്മയ്ക്കും പരുക്കേറ്റു. സംഭവത്തില്‍ നിഷ്പക്ഷമായ അന്വേഷണം നടത്തി കുറ്റക്കാരായ പൊലിസുകാര്‍ക്കെതിരേ നടപടി സ്വീകരിക്കണമെന്ന് പി സത്യപ്രകാശ് പ്രസ്താവനയില്‍ ആവശ്യപ്പെട്ടു.