മേപ്പാടി: ഏഴാചിറ മാമലകുന്നില്‍ അരേക്കര്‍ നെല്‍കൃഷി കരിഞ്ഞുണങ്ങി. മാമലകുന്ന് ചേരിപറമ്പില്‍ കേശവന്റെ കൃഷിയാണ് കരിഞ്ഞുണങ്ങി നശിച്ചത്. ബാങ്കില്‍ നിന്നും വായ്പയെടുത്ത് 25000 രൂപ മുടക്കിയാണ് കൃഷി ചെയ്തത്. ആതിര വിത്താണ് കൃഷിക്ക് ഉപയോഗിച്ചത്. ഏക്കര്‍ കണക്കിന് സ്ഥലം നെല്‍കൃഷിയുള്ള പ്രദേശമാണിത്. എന്നാല്‍ മറ്റ് വിത്തുകള്‍ ഉപയോഗിച്ച വയലുകളില്‍ രോഗബാധയില്ല. വേരുകള്‍ അഴുകുകയും തുടര്‍ന്ന് നെല്‍കൃഷി പൂര്‍ണമായും കരിഞ്ഞുണങ്ങുകയുമാണ്. മഴ കുറവും രോഗ ബാധയും കാരണം കൃഷി നശിക്കാന്‍ കാരണമായെന്ന് കര്‍ഷകര്‍ പറയുന്നു.
കതിരിട്ട് തുടങ്ങുന്ന സമയമാണിത്. എന്നാല്‍ രണ്ടാഴ്ച മുമ്പാണ് രോഗം കണ്ട് തുടങ്ങിയത്. എന്നാല്‍ രോഗം വളരെ വേഗം പെട്ടന്ന് കൃഷി പൂര്‍ണമായും നശിക്കാന്‍ കാരണമായി. മേപ്പാടി പഞ്ചായത്തില്‍ ഏറ്റവും അധികം നെല്‍കൃഷി ഉള്ള പ്രദേശമാണിത്. ജല സേചന സൗകര്യം ഇല്ലാത്തതാണ് പ്രധാന പ്രശ്‌നം. കാരാപ്പുഴ ഡാമിന് തൊട്ട് ചേര്‍ന്നുള്ള പ്രദേശമായിട്ടുപോലും വയലുകളിലേക്ക് ജലം എത്തിക്കാന്‍ നടപടിയുണ്ടായിട്ടില്ല. ജല സേചന സൗകര്യമില്ലാത്തതിനാല്‍ ഏക്കര്‍ കണക്കിന് വയലുകള്‍ ഈ പ്രദേശത്ത് തരിശിട്ടിരിക്കുകയാണ്.