നെടുമ്പാശ്ശേരി: ബസില്‍ കയറുന്നതിനിടെ തെറിച്ചുവീണ് കൊളജ് വിദ്യാര്‍ഥിക്ക് പരുക്കേറ്റു. കുന്നുകര എം.ഇ.എസ് ആര്‍ട്‌സ് കോളജ് ബിസിനസ് മാനേജ്‌മെന്റ് രണ്ടാം വര്‍ഷ വിദ്യാര്‍ഥിനിയും മാഞ്ഞാലി ജാറപ്പടി തൊടിലികുന്നില്‍ സക്കീറിന്റെ ഭാര്യയുമായ ഫര്‍സാന (20)ക്കാണ് പരുക്കേറ്റത്. ഇന്നലെ ഉച്ചയ്ക്ക് 12.45 ന് എം.ഇ.എസ് കോളജ് ജങ്ഷനില്‍ വച്ചാണ് സംഭവം. ബസില്‍ കയറുന്നതിനിടേ ബസ് മുന്നോട്ടെടുത്തതാണ് അപകടത്തിനു കാരണമായത്. പരുക്കേറ്റ ഇവരെ പറവൂര്‍ ജനറല്‍ ആശുപത്രിയില്‍ പ്രവേശിപ്പിച്ചു.
ക്ലാസ് കഴിഞ്ഞ ശേഷം വീട്ടിലേക്ക് പോകുന്നതിനായാണ് എം.ഇ.എസ് കോളജ് ജങ്ഷനില്‍ നിന്നും വിദ്യാര്‍ഥി ബസില്‍ കയറിയത്. ഒരു കാല്‍ ചവിട്ടുപടിയില്‍ ചവിട്ടി അകത്തേക്ക് കയറാന്‍ ശ്രമിക്കുന്നതിനിടെ പെട്ടെന്ന് ബസ് മുന്നോട്ടെടുത്തതോടെ ഫര്‍സാന പുറത്തേക്ക് തെറിച്ചു വീഴുകയായിരുന്നു. റോഡരികില്‍ കെട്ടിക്കിടന്ന ചെളിവെള്ളത്തിലേക്കാണ് തെറിച്ചുവീണത്.സംഭവം കണ്ട് ഓടിയെത്തിയ നാട്ടുകാരാണ് ആശുപത്രിയില്‍ എത്തിച്ചത്.
വിദ്യാര്‍ഥിനി തെറിച്ചു വീഴുന്നത് കണ്ടിട്ടും ബസ് നിര്‍ത്താതെ പോകുകയായിരുന്നുവെന്ന് നാട്ടുകാര്‍ പറഞ്ഞു. മറ്റുള്ളവരെ കയറ്റി കഴിഞ്ഞപ്പോള്‍ വിദ്യാര്‍ഥിനി കയറാന്‍ ശ്രമിക്കുന്നത് ശ്രദ്ധയില്‍പെട്ടിട്ടും ഇവരെ കയറ്റാതെ ബസ് പുറപ്പെടുവാന്‍ ശ്രമിച്ചതാണ് അപകടത്തിനിടയാക്കിയതെന്നാണ് ആക്ഷേപം. കണങ്കാലിനും, മുട്ടുകാലിനും സാരമായ പരിക്ക് സംഭവിച്ചിട്ടുണ്ട്.
പരാതിയെ തുടര്‍ന്ന് ചെങ്ങമനാട് പൊലിസ് കേസെടുത്തു. വിദ്യാര്‍ഥികളെ കയറ്റാതിരിക്കാന്‍ സ്വകാര്യ ബസുകള്‍ സ്റ്റോപ്പുകളില്‍ നിര്‍ത്താതെ പോകുന്നതായും പലപ്പോഴും വിദ്യാര്‍ഥികളെ കയറ്റാതിരിക്കുന്നതായും പരാതി വ്യാപകമാണ്.