പാരിപ്പള്ളി: തെരഞ്ഞെടുപ്പുമായി ബന്ധപ്പെട്ട് പാരിപ്പള്ളിയില്‍ സംഘര്‍ഷം നടന്നു. 142 മുതല്‍ 145 വരെ ബൂത്തുകള്‍ പ്രവര്‍ത്തിച്ച പാരിപ്പള്ളി അമൃത സംസ്‌കൃത സ്‌കൂളിലാണ് ഇന്നലെ രാവിലെ സംഘര്‍ഷമുണ്ടായത്.
വാഹനങ്ങള്‍ സ്‌കൂള്‍ കോംപൗണ്ടിലേക്ക് കടത്തിവിടാന്‍ പൊലിസ് തയാറാവാത്തതാണ് സംഘര്‍ഷത്തില്‍ കലാശിച്ചത്. ഇത് മൂലം രോഗികളും പ്രായമായവരും വോട്ട് രേഖപ്പെടുത്താനാവാതെ മടങ്ങി. തുടര്‍ന്ന് വിവിധ പാര്‍ട്ടി പ്രതിനിധികള്‍ പോലിസുമായി നടത്തിയ ചര്‍ച്ച വാക്കേറ്റത്തിലും ഉന്തിലും തള്ളിലും കലാശിച്ചു. പിന്നീട് വാഹനങ്ങള്‍ കടത്തിവിടാന്‍ പൊലിസ് അനുവദിച്ചതോടെയാണ് സംഘര്‍ഷത്തിന് അയവ് വന്നത്.