കളമശ്ശേരി: മധ്യകേരളത്തിലെ അര്‍ബുദരോഗികള്‍ക്ക് ആശ്വാസം പകര്‍ന്നുകൊണ്ട് കൊച്ചി കാന്‍സര്‍ ഇന്‍സ്റ്റിറ്റ്യൂട്ടിന്റെ പ്രവര്‍ത്തനം ആരംഭിച്ചു. ഏറെ കാത്തിരിപ്പിനും അനിശ്ചിതത്വത്തിനുമൊടുവിലാണ് കാന്‍സര്‍ ഇന്‍സ്റ്റിറ്റ്യൂട്ടിന്റെ ആദ്യപടിയായ ഒ.പി. വിഭാഗം പ്രവര്‍ത്തനം ആരംഭിച്ചത്.

രാവിലെ 10 മണിയോടെ ഒ.പി കൗണ്ടറിലെത്തിയ മൂന്നു രോഗികളെയും ഡോ: ഉഷ ശ്രീവാര്യര്‍ പരിശോധിച്ചു. 18 വര്‍ഷമായി തിരുവനന്തപുരം റീജിയനല്‍ കാന്‍സര്‍ സെന്ററില്‍ ചികിത്സ നടത്തിക്കൊണ്ടിരിക്കുന്ന കോതമംഗലം പുതുക്കയില്‍ ബെന്നി വര്‍ഗീസാണ് ആദ്യ പരിശോധനക്കെത്തിയത്.

[caption id="attachment_155028" align="alignnone" width="620"] ഡോ: ഉഷ ശ്രീവാര്യര്‍ കൊച്ചി കാന്‍സര്‍ സെന്ററിലെത്തിയ ആദ്യ രോഗിക്കൊപ്പം[/caption]

 

 

ഡോ.നീതു ശ്രീധരനും രോഗികളെ പരിശോധിക്കാനെത്തി. തിരുവനന്തപുരം ആര്‍.സി.സിയിലെ ഡോ. ബാലഗോപാല്‍ അടുത്തയാഴ്ച മെഡിക്കല്‍ സൂപ്രണ്ടായി ചുമതലയേല്‍ക്കും. ഇപ്പോള്‍ ഒ.പി വിഭാഗത്തിന്റെ പ്രവര്‍ത്തനമാണ് ആരംഭിച്ചിരിക്കുന്നതെങ്കിലും ഉടന്‍തന്നെ കിടത്തിചികിത്സയും സാധ്യമാകും.

ആദ്യ ഘട്ടത്തില്‍ 150 ബെഡ് ഉള്‍പ്പെടെ സൗകര്യങ്ങള്‍ ഒരുക്കുന്നതിന് 460 കോടി രൂപയാണ് ചെലവു പ്രതീക്ഷിക്കുന്നത്. ആദ്യഘട്ടം രണ്ടു വര്‍ഷത്തിനുള്ളില്‍ പൂര്‍ത്തിയാക്കാന്‍ സാധിക്കുമെന്നാണ് പ്രതീക്ഷ. കളമശ്ശേരിയിലെ സര്‍ക്കാര്‍ മെഡിക്കല്‍ കോളജ് കാംപസില്‍ 12 ഏക്കറിലാണ് കാന്‍സര്‍ സെന്ററിന്റെ പ്രവര്‍ത്തനം.