പൊന്നാനി: പുറങ്ങ് മാരാമുറ്റത്ത് വിട്ടില്‍ നിര്‍ത്തിയിട്ട ബൈക്കിന് അജ്ഞാതര്‍ തീ വച്ചു. തീ ആളിപ്പടര്‍ന്ന് വീടും കത്തിനശിച്ചു. പുറങ്ങ് മാരാമുറ്റത്ത് ചീര്‍പ്പ് പാലത്തിന് സമീപം താമസിക്കുന്ന തയ്യിലക്കായില്‍ ഹാഷിമിന്റെ ബൈക്കിനാണ് ചൊവ്വാഴ്ച പുലര്‍ച്ച രണ്ടു മണിയോടെ അജ്ഞാതര്‍ തീവച്ചത്. തീ ആളിപ്പടര്‍ന്ന് ബൈക്കിന്റെ എന്‍ജിന്‍ പൊട്ടിത്തെറിച്ച് ഓല മേഞ്ഞ വീടിനു മുകളിലേക്ക് കത്തിപ്പടരുകയായിരുന്നു.

ശബ്ദം കേട്ട് ഞെട്ടിയുണര്‍ന്ന വീട്ടുകാര്‍ പിന്‍വാതില്‍ വഴി രക്ഷപ്പെട്ടതിനാല്‍ ആരും അപകടത്തില്‍പ്പെട്ടില്ല. അഞ്ചു പേരാണ് വീട്ടില്‍ ഉണ്ടായിരുന്നത്. നാട്ടുകാര്‍ ഓടിക്കൂടിയാണ് തീയണച്ചത്. അക്രമത്തിന് പിന്നില്‍ ബന്ധുക്കള്‍ ആണെന്നാണ് ഹാഷിമിന്റെ വീട്ടുകാരുടെ ആരോപണം. പോലിസ് അന്വേഷണം ആരംഭിച്ചു.