കോഴിക്കോട്:പക്ഷിപ്പനി വാര്‍ത്തയുടെ ആശങ്കയൊഴിയുന്നതിനു മുമ്പ് സംസ്ഥാനത്ത് വീണ്ടും ചെള്ളുപനി. (സ്‌ക്രബ് ടൈഫസ്)സ്ഥിരീകരിച്ചു. രാമനാട്ടുകര സ്വദേശനിയായ വീട്ടമ്മക്കാണ് ചെള്ളുപനി സ്ഥിരീകരിച്ചത്.
വീട്ടില്‍ വളര്‍ത്തുന്ന മുയലിന്റെ ശരീരത്തില്‍ നിന്നാണ് ഇവര്‍ക്ക് രോഗം പകര്‍ന്നതെന്നാണ് കരുതുന്നത്. ഇതിനു മുമ്പ് തൃശൂര്‍,വയനാട്, ഇടുക്കി ജില്ലകളില്‍ റിപ്പോര്‍ട്ട് ചെയ്ത രോഗം ഈയിടെയാണ് കോഴിക്കോട്ടും സ്ഥിരീകരിച്ചത്. പുതിയ കേസ് റിപ്പോര്‍ട്ട് ചെയ്തതോടെ കോഴിക്കോട്ട് രോഗം ബാധിച്ചവരുടെ എണ്ണം പതിമൂന്നായി. വയനാട് വനപ്രദേശങ്ങള്‍ക്കു സമീപം താമസിക്കുന്ന ഏതാനും പേരില്‍ മാസങ്ങള്‍ക്കു മുമ്പ് രോഗം കണ്ടെത്തിയിരുന്നു.
കൃത്യമായ ചികിത്സ ലഭിച്ചില്ലെങ്കില്‍ മരണത്തിന് കാരണമാകുന്ന രോഗം എലി, മുയല്‍, അണ്ണാന്‍ തുടങ്ങിയ മൃഗങ്ങളിലൂടെയാണ് മനുഷ്യരിലേക്ക് പകരുന്നത്. മൃഗങ്ങളുടെ ശരീരത്തില്‍ കടന്നുകൂടുന്ന ഓറിയന്റാ സുസുഗാമുഷി വിഭാഗത്തില്‍പ്പെട്ട ബാക്ടീരിയകളാണ് രോഗവാഹകര്‍. ആദ്യമായി ജപ്പാനിലാണ് ഈ രോഗം റിപ്പോര്‍ട്ട് ചെയ്തത്.
രോഗം ബാധിച്ചവരുടെ ശരീരത്തില്‍ സിഗററ്റ് കൊണ്ട് പൊള്ളിച്ചതുപോലെ വൃത്താകൃതിയില്‍ വ്രണം രൂപപ്പെടും.  കടുത്ത പനി, തലവേദന, വിറയല്‍ തുടങ്ങിയവയാണ് ലക്ഷണങ്ങള്‍. ചെള്ളില്‍ നിന്നും മനുഷ്യന് കടിയേറ്റ് 12 ദിവസം കഴിഞ്ഞാലെ രോഗലക്ഷണങ്ങള്‍ പ്രകടമാകൂ. രോഗം മൂര്‍ഛിച്ച് പിന്നീട് ന്യൂമോണിയയായും തലച്ചോറിനെ ബാധിക്കും. ഇടവേളക്കു ശേഷം ജനവാസമേഖലയില്‍ രോഗം സ്ഥിരീകരിച്ചത് ആശങ്കയുളവാക്കിയിട്ടുണ്ട്.