ഹൈദരാബാദ്: സി.കെ നായിഡു ട്രോഫി അണ്ടര്‍ 23 ക്രിക്കറ്റില്‍ കേരളത്തിനെതിരേ ഹൈദരാബാദിനു വിജയിക്കാന്‍ ഒന്‍പതു വിക്കറ്റുകള്‍ കൈയിലിരിക്കേ 195 റണ്‍സ് കൂടി.
198 റണ്‍സ് വിജയ ലക്ഷ്യം തേടിയിറങ്ങിയ ഹൈദരാബാദ് രണ്ടാം ദിനം കളി നിര്‍ത്തുമ്പോള്‍ ഒരു വിക്കറ്റ് നഷ്ടത്തില്‍ മൂന്നു റണ്‍സെന്ന നിലയില്‍. ആദ്യ ഇന്നിങ്‌സില്‍ കേരളം 235 റണ്‍സിനു എല്ലാവരും പുറത്തായപ്പോള്‍ ഹൈദരാബാദിന്റെ ഒന്നാം ഇന്നിങ്‌സ് 145 റണ്‍സില്‍ ഒതുക്കാന്‍ കേരളത്തിനു സാധിച്ചു. എന്നാല്‍ രണ്ടാം ഇന്നിങ്‌സില്‍ കേരളത്തിന്റെ ചെറുത്തു നില്‍പ്പ് 107 റണ്‍സില്‍ അവസാനിപ്പിച്ചാണ് ഹൈദരാബാദ് 198 റണ്‍സ് ലക്ഷ്യത്തിലേക്ക് ബാറ്റു വീശുന്നത്.
ആദ്യ ഇന്നിങ്‌സില്‍ കേരളത്തിനായി സല്‍മാന്‍ നിസാര്‍ (65), വിഷ്ണു വിനോദ് (62), മുഹമ്മദ് അസ്ഹറുദ്ദീന്‍ (45) എന്നിവര്‍ തിളങ്ങി. ബൗളിങില്‍ അക്ഷയ് കെ.സി അഞ്ചു വിക്കറ്റും അക്ഷയ് ചന്ദ്രന്‍ മൂന്നു വിക്കറ്റും ഫാബിദ് മുഹമ്മദ് രണ്ടു വിക്കറ്റും വീഴ്ത്തി. രണ്ടാമിന്നിങ്‌സില്‍ കേരളത്തിനായി ആല്‍ബിന്‍ അലിയാസ് (55), സല്‍മാന്‍ നിസാര്‍ (31) എന്നിവര്‍ മാത്രമാണ് രണ്ടക്കം കടന്നത്.