തിരുവനന്തപുരം: സര്‍ക്കാര്‍ ഭൂമിയിലെ മരങ്ങള്‍ മുറിച്ചുവിറ്റ സംഭവം വിവാദത്തിലേക്ക്. അന്വേഷണം ആവശ്യപ്പെട്ട് പഞ്ചായത്ത് സെക്രട്ടറി പരാതി നല്‍കി.
മലയിന്‍കീഴ് പഞ്ചായത്തില്‍ മാവോട്ടുകോണം വാര്‍ഡിലെ  തേവുപാറ ശുദ്ധജല സംഭരണി സ്ഥിതിചെയ്യുന്ന പഞ്ചായത്തുവക അന്‍പതു സെന്റ് ഭൂമിയില്‍ നിന്ന 52 മരങ്ങളാണ് മുറിച്ചു വിറ്റത്.
 കാളിപ്പാറ ശുദ്ധജല പദ്ധതിയുടെ ഭാഗമായുള്ള തേവുപാറയിലെ ജലസംഭരണി സ്ഥിതിചെയ്യുന്ന സര്‍ക്കാര്‍ ഭൂമിയിലെ കാടുവെട്ടിത്തെളിക്കാന്‍  പഞ്ചായത്ത്  കമ്മിറ്റി തീരുമാനിച്ചിരുന്നു. ഇതിനായി പഞ്ചായത്ത് അംഗത്തെ   ചുമതലപ്പെടുത്തി. ദിവസങ്ങള്‍ക്ക് മുന്‍പ് പ്രദേശത്ത് നടന്ന ശുചീകരണ പ്രവര്‍ത്തനത്തിന്റെ മറവില്‍ ജലസംഭരണിക്ക് ചുറ്റുമുണ്ടായിരുന്ന അല്‍ക്വേഷ്യ, ആഞ്ഞില്‍, ചീലാന്തി തുടങ്ങിയ മരങ്ങള്‍ മുറിച്ചുനീക്കുകയായിരുന്നു.മുറിച്ചിട്ട മരങ്ങള്‍  അന്തിയൂര്‍കോണത്തെ സ്വകാര്യ തടിമില്ലിന് വില്‍ക്കുകയും ചെയ്തു. പഞ്ചായത്ത് അനുമതിയുണ്ടെന്ന് മില്ലുടമയെ വിശ്വസിപ്പിച്ചായിരുന്നു വില്‍പന. തടിമില്ലില്‍ വില്‍പ്പനയ്ക്ക് കൊണ്ടുവന്ന മരങ്ങള്‍ എവിടെനിന്നെന്ന അന്വേഷണമാണ് നാട്ടുകാരെ തേവുപാറയിലെ സര്‍ക്കാര്‍ ഭൂമിയിലെത്തിച്ചത്.
നാട്ടുകാര്‍ വിവരം അറിയിച്ചതിനെ തുടര്‍ന്ന് പഞ്ചായത്ത് സെക്രട്ടറിയും  മലയിന്‍കീഴ് എസ്‌ഐ ഷാനിഫിന്റെ നേതൃത്വത്തില്‍ പൊലിസും സ്ഥലത്തെത്തി. തുടര്‍ന്ന് പഞ്ചായത്തിന്റെ അനുമതി ഇല്ലാതെ മരങ്ങള്‍ മുറിച്ചുവിറ്റതിന് സെക്രട്ടറി പൊലിസില്‍ പരാതിനല്‍കി. സെക്രട്ടറിയുടെ മൊഴി രേഖപ്പെടുത്തിയ ശേഷം നടപടി സ്വീകരിക്കുമെന്ന് പൊലിസ് പറഞ്ഞു.