കോഴിക്കോട്: അഗ്നിസുരക്ഷാ മാനദണ്ഡങ്ങള്‍ പാലിക്കാത്തതിന്റെ പേരില്‍ മാവൂര്‍ റോഡ് ജങ്ഷനിലെ എട്ടുനില കെട്ടിടം കോര്‍പറേഷന്‍ അടപ്പിച്ചു. ജില്ലാ കലക്ടറുടെ ഉത്തരവിനെ തുടര്‍ന്നാണ് പൊലിസ് സഹായത്തോടെ കോര്‍പറേഷന്റെ ആരോഗ്യവിഭാഗം സ്‌കൈ ടവര്‍ എന്ന പേരിലുള്ള കെട്ടിടം അടച്ചുപൂട്ടിയത്.
നഗരത്തിലെ കെട്ടിടങ്ങള്‍ക്കെല്ലാം കോര്‍പറേഷന്‍ ആരോഗ്യ വിഭാഗം അഗ്നിസുരക്ഷാ മാനദണ്ഡങ്ങള്‍ നടപ്പില്‍ വരുത്തണമെന്നാവശ്യപ്പെട്ട് നോട്ടിസ് നല്‍കിയിരുന്നു. എന്നാല്‍ ഈ സ്ഥാപനം നാലുമാസം കഴിഞ്ഞിട്ടും ഇതു സംബന്ധിച്ച് യാതൊരു നടപടിയും ആരംഭിക്കുക പോലും ചെയ്തിട്ടില്ലെന്ന് കോര്‍പറേഷന്‍ അധികൃതര്‍ ചൂണ്ടിക്കാട്ടി.
നഗരത്തില്‍ ആശുപത്രികളടക്കമുള്ള മറ്റു ചില കെട്ടിടങ്ങള്‍ക്കും അഗ്നിസുരക്ഷാ മാനദണ്ഡങ്ങള്‍ നടപ്പാക്കണമെന്നാവശ്യപ്പെട്ട് നോട്ടിസ് നല്‍കിയിരുന്നു. മറ്റു സ്ഥാപനങ്ങള്‍ അഗ്നിസുരക്ഷാ മാനദണ്ഡങ്ങള്‍ നടപ്പിലാക്കാനുള്ള നടപടി തുടങ്ങിയിട്ടുണ്ട്. അഗ്നിസുരക്ഷാ മാനദണ്ഡങ്ങള്‍ നടപ്പിലാക്കാത്തത് സംബന്ധിച്ച് ഫയര്‍ ആന്‍ഡ് റെസ്‌ക്യൂ ജില്ലാ കലക്ടര്‍ക്ക് നല്‍കിയ റിപ്പോര്‍ട്ടിനെ തുടര്‍ന്നാണ് നടപടി. കോര്‍പറേഷന്‍ ആരോഗ്യവിഭാഗം ഉദ്യോഗസ്ഥര്‍ക്കൊപ്പം നടക്കാവ് സി.ഐ ജി ഗോപകുമാറിന്റെ നേതൃത്വത്തില്‍ പൊലിസും കലക്ടറുടെ ഉത്തരവ് നടപ്പാക്കാനായി എത്തിയിരുന്നു. ഫയര്‍ ആന്‍ഡ് സേഫ്റ്റിയുടെ മാനദണ്ഡങ്ങള്‍ നടപ്പാക്കി റിപ്പോര്‍ട്ട് നല്‍കിയാല്‍ കെട്ടിടം തുറക്കാനുള്ള അനുമതി നല്‍കും. മുക്കം മണാശ്ശേരിയില്‍ പ്രവര്‍ത്തിക്കുന്ന കെ.എം.സി.ടി മെഡിക്കല്‍ കോളജും അഗ്നിസുരക്ഷാ മാനമണ്ഡങ്ങള്‍ പാലിക്കാത്തതിന്റെ പേരില്‍ നഗരസഭാ അധികൃതര്‍ കഴിഞ്ഞദിവസം അടച്ചുപൂട്ടാന്‍ ഉത്തരവിട്ടിരുന്നു.