മലപ്പുറം: ജില്ലയില്‍ പ്രശ്‌നസാധ്യതയുള്ള 121 ബൂത്തുകളിലെ വോട്ടെടുപ്പ് 'അക്ഷയ'യുടെ നേതൃത്വത്തില്‍ തത്സമയ വെബ്‌സംപ്രേഷണം നടത്തി.
ഈ പോളിങ് സ്റ്റേഷനുകളില്‍ സ്ഥാപിച്ച വെബ്കാമറ വഴി പോളിങ്  പൂര്‍ണമായി കേന്ദ്ര തെരഞ്ഞെടുപ്പ് കമ്മിഷനും സംസ്ഥാന മുഖ്യ തെരഞ്ഞെടുപ്പ് ഓഫിസര്‍ക്കും തത്സമയം നിരീക്ഷിക്കാനായി. കലക്ടറേറ്റ് സമ്മേളന ഹാളില്‍ സജ്ജമാക്കിയ കംപ്യൂട്ടര്‍-ടെലിവിഷന്‍-എല്‍.സി.ഡി സ്‌ക്രീനുകളിലും ഉദ്യോഗസ്ഥര്‍ തത്സമയം നിരീക്ഷിച്ച് ഇവിടങ്ങളിലെ പോളിങ് സമാധാനപരമാണെന്ന്  ഉറപ്പുവരുത്തി.
ജില്ലാ തെരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കലക്ടര്‍ എസ്. വെങ്കടേസപതി, തിരൂര്‍ സബ് കലക്ടര്‍ അദീല അബ്ദുല്ല, എ.ഡി.എം ബി. കൃഷ്ണകുമാര്‍, ഇലക്ഷന്‍ ഡെപ്യൂട്ടി  കലക്ടര്‍ സി.വി സജന്‍ എന്നിവര്‍ സ്‌ക്രീനുകള്‍ക്ക് മുന്നിലെത്തി പോളിങ് നിരീക്ഷിച്ചു.

നാഷണല്‍ ഇന്‍ഫര്‍മാറ്റിക് സെന്റര്‍, കെല്‍ട്രോണ്‍ എന്നിവയുടെ സാങ്കേതിക സഹായത്തോടെയാണ് അക്ഷയ വെബ്കാസ്റ്റിങ് സംവിധാനം ഒരുക്കിയത്.