അടിമാലി: ദേശീയ പാതയുടെ വികസനത്തിന് തടസം നില്‍ക്കുന്ന വനപാലകരുടെ നടപടയില്‍ പ്രതിഷേധിച്ച് വ്യാപാരി വ്യവസായി ഏകോപന സമിതി അടിമാലി ബ്ലോക്ക് കമ്മറ്റിയുടെ നേതൃത്വത്തില്‍ നേര്യമംഗലം റേഞ്ച് ഓഫീസിലേക്ക് മാര്‍ച്ചും ധര്‍ണ്ണയും നടത്തി.
റോഡിലൂടെ സഞ്ചരിക്കുവാനുള്ള മൗലിക അവകാശം വനംവകുപ്പ് നിഷേധിക്കുകയാണെന്ന് വ്യാപാരി വ്യവസായി ഏകോപന സമിതി ജില്ലാ പ്രസിഡന്റ് മാരിയില്‍ കൃഷ്ണന്‍ നായര്‍ ധര്‍ണ്ണ ഉദ്ഘാടനം ചെയ്തുകൊണ്ട് പറഞ്ഞു. വനംവകുപ്പ് ഉദ്യോഗസ്ഥരുടെ ഇത്തരം ജനവിരുദ്ധ നയങ്ങള്‍ അവസാനിപ്പിച്ചില്ലെങ്കില്‍ ഉദ്യോഗസ്ഥരെ ജനങ്ങള്‍ റോഡില്‍ തടഞ്ഞ് കൈകാര്യം ചെയ്യേണ്ട സാഹചര്യമുണ്ടാകുമെന്നും നേതാക്കള്‍ മുന്നറിയിപ്പു നല്‍കി. അടിമാലി ബ്ലോക്കു കമ്മിറ്റിയുടെ നേതൃത്വത്തില്‍ 21 യൂണിറ്റുകളിലെ വ്യാപാര സ്ഥാപനങ്ങള്‍ അടച്ചിട്ടുകൊണ്ടായിരുന്നു സമരം. നേര്യമംഗലം ഫോറസ്റ്റ് റേഞ്ച് ഓഫീസു മുന്‍പില്‍ നടന്ന ധര്‍ണ്ണയില്‍ ബ്ലോക്ക് പ്രസിഡന്റ് ഇ.പി. ഏലിയാസ് അധ്യക്ഷത വഹിച്ചു. വ്യാപാരി വ്യവസായി ഏകോപന സമിതി ജില്ലാ വര്‍ക്കിംങ് പ്രസിഡന്റ് കെ.എന്‍. ദിവാകരന്‍, ജനറല്‍ സെക്രട്ടറി കെ.പി. ഹസന്‍, വൈസ് പ്രസിഡന്റ് കെ.ആര്‍. വിനോദ്, ബ്ലോക്ക് ജനറല്‍ സെക്രട്ടറി പി.എം. ബേബി, അടിമാലി യൂണിറ്റ് പ്രസിഡന്റ് വര്‍ഗീസ് ചെറിയാന്‍, അഡ്വ. ഷൈജന്‍ ജോസഫ്, പ്രൊഫ. ജോസുകുട്ടി ഒഴുകയില്‍, ഡയസ് ജോസ് തുടങ്ങിയവര്‍ സംസാരിച്ചു.