പാലക്കാട്: കാവേരി നദീജലം പങ്കിടലിന്റെ  ഭാഗമായി ശിരുവാണിയില്‍ അണക്കെട്ട് നിര്‍മിച്ച് വെള്ളമെടുക്കാന്‍ കേരളസര്‍ക്കാര്‍ പദ്ധതിയിട്ട അട്ടപ്പാടി വാലി പദ്ധതിക്ക് അകാലചരമം. കേന്ദ്ര വനം പരിസ്ഥിതി മന്ത്രാലയം പദ്ധതി നടപ്പാക്കാന്‍ പാരിസ്ഥിതികാഘാത പഠനം നടത്താന്‍ നല്‍കിയ അനുമതിയാണ് റദ്ദാക്കിയത്. മൂന്നുമാസം മുന്‍പാണ് കേരളത്തിന് പഠനാനുമതി നല്‍കിയത്. തമിഴ്‌നാട് മുഖ്യമന്ത്രി ജയലളിത പദ്ധതിക്ക് അനുമതി നല്‍കരുതെന്നാവശ്യപ്പെട്ട് രണ്ടുമാസം മുന്‍പ് പ്രധാനമന്ത്രി നരേന്ദ്ര മോദിക്ക് കത്തയച്ചിരുന്നു.
തമിഴ്‌നാട്ടില്‍ കക്ഷി രാഷ്ട്രീയം മറന്ന്, ശിരുവാണിയില്‍ ഡാം നിര്‍മിക്കുന്നുവെന്നാരോപിച്ച് ആഴ്ചകളോളം സമരം നടത്തുകയും, കേരളത്തിലേക്കുള്ള വാഹനങ്ങള്‍ തടയുകയും ചെയ്തിരുന്നു. കാവേരി നദീജലം പങ്കിടുന്നതിന്റെ  ഭാഗമായാണ് ഭവാനിയുടെ പോഷകനദിയായ ശിരുവാണിയിലെ ചിറ്റൂര്‍ പ്രദേശത്ത് ഡാം നിര്‍മിക്കാന്‍ 30 വര്‍ഷം മുന്‍പാണ് സംസ്ഥാനം പദ്ധതിയിട്ടിരുന്നത്. അന്നുമുതല്‍ തമിഴ്‌നാട്ടില്‍ ഇതിനെതിരേ കര്‍ഷകരും നിലകൊണ്ടിരുന്നു. പിന്നീട് പദ്ധതി കേരളം ഉപേക്ഷിച്ച മട്ടായിരുന്നു.
മോദി സര്‍ക്കാര്‍ അധികാരത്തില്‍ വന്നതോടെ വീണ്ടും പദ്ധതി നടപ്പാക്കാനുള്ള അനുമതിക്കായി കേന്ദ്രസര്‍ക്കാരിനെ സമീപിച്ചു. മൂന്നുമാസം മുന്‍പ് പാരിസ്ഥിതികാഘാത പഠനം നടത്താന്‍ അനുവാദം നല്‍കുകയും ജലസേചന വകുപ്പ് സെപ്റ്റംബര്‍ മുതല്‍ പഠനം ആരംഭിക്കുകയും ചെയ്തു.
ഈ മാസം കേന്ദ്രത്തിന് റിപ്പോര്‍ട്ട് നല്‍കി അനുമതി വാങ്ങിക്കാനിരിക്കെയാണ് കേരളാ സര്‍ക്കാരിന് തിരിച്ചടി നല്‍കി പദ്ധതിക്കായുള്ള പഠനം നിര്‍ത്തിവയ്ക്കാന്‍ കേന്ദ്ര പരിസ്ഥിതി മന്ത്രാലയം ഉത്തരവിറക്കിയത്.
ഇനി തമിഴ്‌നാടുമായി  സമവായത്തിലെത്തിയതിനുശേഷം  അനുമതി നല്‍കാമെന്നാണ് കേരളത്തെ അറിയിച്ചിട്ടുള്ളത്. ചുരുക്കി പറഞ്ഞാല്‍  ഈ പദ്ധതിക്ക് കേന്ദ്രസര്‍ക്കാര്‍ അനുമതി  നല്‍കാന്‍ സാധ്യതയില്ല.
കേരളത്തിന്റെ വീഴ്ചയും അനാസ്ഥയുമാണ് അനുമതി റദ്ദാക്കാന്‍  കാരണം. അതേസമയം പദ്ധതി നടപ്പാക്കാന്‍ തമിഴ്‌നാട് സര്‍ക്കാരുമായി സമവായ ചര്‍ച്ച നടത്താന്‍ നടപടിയെടുക്കുമെന്ന് ജലസേചന വകുപ്പ് മന്ത്രി മാത്യു. ടി. തോമസ് സുപ്രഭാതത്തോട് പറഞ്ഞു.
തമിഴ്‌നാട് സഹകരിക്കാന്‍ തയാറായില്ലെങ്കില്‍, സുപ്രിം കോടതിയില്‍ കേസ് ഫയല്‍ ചെയ്യുമെന്നും മന്ത്രി കൂട്ടിച്ചേര്‍ത്തു.