വടക്കേക്കാട്: പാഠഭാഗം എഴുതാത്തതിന് എല്‍.കെ.ജി വിദ്യാര്‍ഥിയെ മര്‍ദിച്ച അധ്യാപികയെ പരാതിയെ തുടര്‍ന്ന് സ്‌കൂളധികൃതര്‍ പുറത്താക്കി. ഐ.സി.എ ഇംഗ്ലീഷ് മീഡിയം സ്‌കൂളിലെ എല്‍.കെ.ജി വിദ്യാര്‍ഥി തൊഴിയൂര്‍ കല്ലംവീട്ടില്‍ ജംഷീറിന്റെ മകന്‍ സിയാന്‍ ജംഷീറിനാണ് അധ്യാപികയില്‍ നിന്ന് ചൂരല്‍ കൊണ്ടുള്ള മര്‍ദനമേറ്റത്. ഇരു കാലുകളുടെയും മുട്ടിന് താഴെ പിന്‍ഭാഗത്തായി ചൂരല്‍ അടിയേറ്റ ആറ് പാടുകളുണ്ട്. വിദ്യാര്‍ഥി മുതുവട്ടൂരിലെ സ്വകാര്യ ആശുപത്രിയില്‍ ചികിത്സയിലാണ്. തിങ്കളാഴ്ച ഉച്ചയോടെയാണ് അധ്യാപിക കുട്ടിയെ അടിച്ചത്. പാഠഭാഗങ്ങള്‍ എഴുതി കൊണ്ടു വരാത്തതിന് ഭക്ഷണം കഴിക്കുന്ന സമയത്ത് ബെഞ്ചില്‍ കയറ്റി നിര്‍ത്തിയാണ് അധ്യാപിക അടിച്ചതെന്ന് സിയാന്‍ ജംഷീര്‍ പറഞ്ഞു. ഇന്നലെ രാവിലെ സ്‌കൂളിലേക്ക് കൊണ്ടു വിടാനായി പിതാവിന്റെ സഹോദരന്‍ റഫീഖ് വീട്ടില്‍ എത്തിയപ്പോഴാണ് കുട്ടി വിവരം പുറത്തു പറയുന്നത്. കുട്ടിയുടെ പിതാവ് കഴിഞ്ഞ ദിവസമാണ് വിദേശത്തേക്ക് പോയത്. രക്ഷിതാക്കളുടെ പരാതിയെ തുടര്‍ന്ന് വടക്കേക്കാട് പൊലിസ് കേസെടുത്തു.