കുമ്പള: പൊലിസ് കൈകാണിച്ചിട്ടും നിര്‍ത്താതെ മണലുമായി പോയ ടിപ്പര്‍ ലോറിയെ പൊലിസ് പിന്തുടര്‍ന്നു പിടികൂടി. ഡ്രൈവര്‍ ഓടി രക്ഷപ്പെട്ടു. ഇന്നലെ രാവിലെ പതിനൊന്നര മണിയോടെ ആരിക്കാടിയിലാണു സംഭവം. ഷിറിയ പുഴയില്‍ നിന്ന് അനധികൃതമായി എടുത്ത മണലുമായി വരികയായിരുന്നു ടിപ്പര്‍. ദേശീയ പാതയില്‍ വാഹന പരിശോധന നടത്തുകയായിരുന്ന പൊലിസ് കൈ കാണിച്ചെങ്കിലും വണ്ടി നിര്‍ത്തിയില്ല. പിന്തുടര്‍ന്ന പൊലിസ് മുട്ടം ഗേറ്റിനടുത്തെത്തിയപ്പോള്‍ ടിപ്പര്‍ റോഡരികില്‍ ഉപേക്ഷിച്ചു ഡ്രൈവര്‍ രക്ഷപ്പെടുകയായിരുന്നു. കെ.എല്‍ 14 കെ 567 നമ്പര്‍ ടിപ്പര്‍ പൊലിസ് കസ്റ്റഡിയിലെടുത്തു. ഓടിപ്പോയ ഡ്രൈവറെ കണ്ടെത്താനുള്ള നടപടികള്‍ ആരംഭിച്ചതായി പൊലിസ് പറഞ്ഞു.

.