തിരൂര്‍: സ്വകാര്യ മില്ലിലേക്കു റേഷന്‍ ഷോപ്പില്‍ നിന്നും വന്‍തോതില്‍ അനധികൃതമായി കടത്തിയ അരി നാട്ടുകാര്‍ പിടികൂടി. നിറമരുതൂര്‍ പത്തമ്പാട് പി.മുഹമ്മദ് മുസ്തഫയുടെ ഉടമസ്ഥതതയിലുള്ള 64 -ാ0 നമ്പര്‍ റേഷന്‍ ഷാപ്പില്‍ നിന്നാണു 10 ചാക്ക് അരി കടത്തിയത്. ചൊവ്വാഴ്ച രാത്രിയില്‍ ബംഗാളി തൊഴിലാളികളെ ഉപയോഗിച്ച് അരി കടത്തുകയായിരുന്നു.
റേഷന്‍ ഷോപ്പിന്റെ സമീപത്തുള്ള മുറിവഴിക്കല്‍ സ്വദേശിയുടെ ഉടമസ്ഥതയിലുള്ള അരി മില്ലിലേക്കാണ് അരി കടത്തിയത്. ചൊവ്വാഴ്ച രാത്രി ഒന്‍പതോടെയാണു സംഭവം. അരി ചാക്കുകളുമായി അന്യസംസ്ഥാന തൊഴിലാളികള്‍ പോകുന്നതു കണ്ടവര്‍ പ്രദേശവാസികളെ വിവരമറിയിക്കുകയായിരുന്നു. വിവരമറിഞ്ഞു നാട്ടുകാര്‍ സംഘടിക്കുകയും അരി മില്ലിലേക്ക് ഒരുമിച്ചെത്തി പരിശോധന നടത്തുകയുമായിരുന്നു. തുടര്‍ന്നാണ് 10 ചാക്ക് റേഷനരി കണ്ടെത്തിയത്.
താനൂര്‍ പൊലിസിലും സപ്ലൈ ഓഫിസിലും വിവരമറിയിച്ചുവെങ്കിലും അധികൃതര്‍ നടപടിയെടുക്കാന്‍ തയാറായില്ലെന്നു നാട്ടുകാര്‍ പറഞ്ഞു. ഇതിനു മുമ്പും ഈ റേഷന്‍ ഷോപ്പില്‍ നിന്നും അരി കരിഞ്ചന്തയിലേക്ക് കടത്തിയതായി നാട്ടുകാര്‍ ആരോപിച്ചു.