മുക്കം: ഒന്നേകാല്‍ കിലോ കഞ്ചാവുമായി യുവാവ് പൊലിസ് പിടിയിലായി. മലയോര മേഖലയില്‍ വിദ്യാഭ്യാസ സ്ഥാപനങ്ങളും അങ്ങാടികളും കേന്ദ്രീകരിച്ച് കഞ്ചാവ് വില്‍പ്പന നടത്തുന്ന അമ്പലക്കണ്ടി എലത്തൂര്‍ കോളനിയില്‍ താമസിക്കുന്ന ഷരീഫ് (44) ആണ് പിടിയിലായത്. നാലു വര്‍ഷത്തോളമായി പൊലിസ് നിരീക്ഷണത്തിലായിരുന്നു ഇയാള്‍. പൊലിസിനു ലഭിച്ച രഹസ്യവിവരത്തിന്റെ അടിസ്ഥാനത്തിലാണ് ഇന്നലെ മാമ്പറ്റ കാര്‍ത്തിക കല്യാണ മണ്ഡപത്തിനു സമീപത്തുവച്ച് ഇയാള്‍ ഒരു കിലോ 225 ഗ്രാം കഞ്ചാവുമായി പിടിയിലായത്. കൊടുവള്ളി, മുക്കം, താമരശ്ശേരി, ഓമശ്ശേരി, എന്‍.ഐ.ടി, കെ.എം.സി.ടി പരിസരം തുടങ്ങിയ സ്ഥലങ്ങളില്‍ ഇയാള്‍ കഞ്ചാവ് വില്‍പ്പന നടത്തിവരികയായിരുന്നുവെന്ന് മുക്കം എസ്.ഐ സനല്‍രാജ് പറഞ്ഞു. പരിശോധനയില്‍ എസ്.ഐ സലിം, എ.എസ്.ഐ വേണുഗോപാല്‍ കൂടെയുണ്ടായിരുന്നു. കോടതിയില്‍ ഹാജരാക്കിയ ഷരീഫിനെ റിമാന്‍ഡ് ചെയ്തു.