തൊഴിലാളിക്കും എസ്.ഐക്കും പരുക്ക്
കോവളം: വിഴിഞ്ഞത്ത്  എസ്.ഐ. ഓടിച്ചിരുന്ന പൊലിസ് ജീപ്പ് നിയന്ത്രണം തെറ്റി വീടിന്റെ മതില്‍ തകര്‍ത്ത് വര്‍ക്ക്‌ഷോപ്പിലേക്ക് ഇടിച്ച് കയറിയുണ്ടായ
അപകടത്തില്‍ വര്‍ക്ക് ഷോപ്പിലെ തൊഴിലാളിക്കും വാഹനം ഓടിച്ചിരുന്ന എസ്.ഐക്കും പരുക്കേറ്റു.
ജീപ്പോടിച്ചിരുന്ന വിഴിഞ്ഞം സ്റ്റേഷനിലെ ഗ്രേഡ് എസ്.ഐ ജയകുമാറിനും വര്‍ക്ക് ഷോപ്പിലെ ജീവനക്കാരനായ അജീഷിനുമാണ് പരുക്കേറ്റത്. വിഴിഞ്ഞം വെങ്ങാനൂര്‍ റോഡില്‍  ഇന്നലെ രാവിലെ എട്ട് മണിയോടെ വിഴിഞ്ഞം സ്റ്റേഷനിലെ ജീപ്പാണ് അപകടത്തില്‍പ്പെട്ടത്. വിഴിഞ്ഞത്ത് നിന്ന് വെങ്ങാനൂരിലേക്ക് പോവുകയായിരുന്ന പൊലിസ് ജീപ്പ്  നിയന്ത്രണം വിട്ട് റോഡ് സൈഡിലെ ഷിബുവിന്റെ വീട് മതില്‍ തകര്‍ത്ത് ഇവിടത്തെ കരകൗശല പണിക്കാരനായ അജീഷിന്റെ ബൈക്കും ഇടിച്ച് തെറിപ്പിച്ച ശേഷം വീടിന്റെ പോര്‍ച്ചിലുള്ള തടികളില്‍ ഇടിച്ച് നില്‍ക്കുകയായിരുന്നു. കൈക്ക് പരുക്കേറ്റ അജീഷ് ഭാഗ്യംകൊണ്ട് രക്ഷപ്പെടുകയായിരുന്നു.
പരുക്കേറ്റ ഇരുവരെയും വിഴിഞ്ഞം സര്‍ക്കാര്‍ ആശുപത്രിയില്‍ പ്രവേശിപ്പിച്ചു. അപകടം നടന്ന സമയത്ത് റോഡില്‍ മറ്റ് വാഹനങ്ങളില്ലാതിരുന്നതും  ജീപ്പ് ഇടിച്ച  വീട്ടിന്റെ മുറ്റത്ത് മറ്റാരുമില്ലാതിരുന്നതും കാരണം വന്‍ അത്യാഹിതമാണ് ഒഴിവായത്. ജിപ്പിന്റെ അമിത വേഗമാണ് അപകടത്തിന് കാരണമെന്നാരോപിച്ച് നാട്ടുകാര്‍ തടിച്ച് കൂടിയത് സംഘര്‍ഷത്തിന്റെ വക്കിലെത്തിച്ചു.ആവശ്യമായ നഷ്ട പരിഹാരം നല്‍കാമെന്നറിയിച്ച് സംഭവം ഒത്ത് തീര്‍ത്തതോടെയാണ് സംഘര്‍ഷാവസ്ഥക്ക് അയവുവന്നത്. ജീപ്പിനുള്ളില്‍ സീറ്റിനടിയില്‍ കിടന്ന വെള്ളത്തിന്റെ ബോട്ടില്‍ ബ്രേക്ക് പെഡലിന്റെ അടിയിലേക്ക് ഉരുണ്ട് കയറി കുടുങ്ങി ബ്രേക്ക് ചവിട്ടാന്‍ കഴിയാതായതോടെയാണ് ജീപ്പിന്റെ നിയന്ത്രണം നഷ്ടപ്പെട്ടതെന്നാണ് വിവരം.