രാജാക്കാട്: സി.പി.ഐ മന്ത്രിമാര്‍ക്കെതിരേ താന്‍ പറഞ്ഞത് തെറ്റായ രീതിയിലല്ലെന്ന് എം.എം മണി എം.എല്‍.എ. അത് വേണ്ട രീതിയില്‍ മനസ്സിലാക്കാതെ തനിക്കെതിരേ സി.പി.ഐ ജില്ലാ സെക്രട്ടറി മറുപടി പറയുകയാണെന്നും എം.എം മണി പറഞ്ഞു. കര്‍ഷക സംഘം ജില്ലാ സമ്മേളനത്തിന്റെ ഭാഗമായി രാജാക്കാട്ട ് സംഘടിപ്പിച്ച പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
കാസര്‍കോടുള്ള മന്ത്രിക്ക് ഇവിടുത്തെ കാര്യങ്ങള്‍ വ്യക്തമായി അറിയില്ല. അത് പഠിപ്പിക്കണം എന്നതാണ് താന്‍ പറഞ്ഞത്. ജില്ലയിലെ എല്‍.ഡി.എഫ് നേതൃത്വം ഒറ്റക്കെട്ടായി നിന്ന് പ്രവര്‍ത്തിക്കുന്നതടക്കമുള്ള കാര്യങ്ങള്‍ പരാമര്‍ശിച്ചിരുന്നിട്ടും അത് മാധ്യമങ്ങള്‍ റിപ്പോര്‍ട്ട് ചെയ്തിട്ടില്ല. ചില കാര്യങ്ങള്‍ വളച്ചൊടിയ്ക്കുകയാണ്. വക്കീലന്മാരുമായുള്ള പ്രശ്‌നങ്ങളില്‍ അടക്കം മാധ്യമ പ്രവര്‍ത്തകരെ സംരക്ഷിക്കുന്ന നിലപാടാണ് പാര്‍ട്ടി സ്വീകരിക്കുന്നത്. താന്‍ പറഞ്ഞ കാര്യങ്ങള്‍ നിഷേധിക്കാന്‍  തയ്യാറല്ലെന്നും എം.എം മണി  പറഞ്ഞു.