പന്തല്ലൂര്‍: റോഡിലിറങ്ങിയ കാട്ടാന ബസിന്റെ ചില്ല് അടിച്ചുതകര്‍ത്തു. പന്തല്ലൂരിന് സമീപം ഏലിയാസ് കടയില്‍ റോഡിലിറങ്ങിയ ആന തമിഴ്‌നാട് ട്രാന്‍സ്‌പോര്‍ട്ട് ബസിന്റെ ചില്ലാണ് തകര്‍ത്തത്. ഇന്നലെ ഉച്ചയോടെയാണ് സംഭവം.
മേട്ടുപ്പാളയത്തുനിന്ന് കൊളപ്പള്ളിയിലേക്ക് തിരികെ സര്‍വിസ് നടത്തുന്ന ബസാണ് ആനയുടെ ആക്രമണത്തിനിരയായത്. ഏലിയാസ്‌കടക്ക് സമീപമെത്തിയപ്പോള്‍ റോഡില്‍ ആനയെ കണ്ടതോടെ ഡ്രൈവര്‍ ബസ് അല്‍പം ദൂരെ നിര്‍ത്തിയിട്ടു. എന്നാല്‍ ബസിന് പിന്നാലെയെത്തിയ വാഹനം ശബ്ദത്തില്‍ ഹോണ്‍ മുഴക്കിയതോടെ കലിപൂണ്ട ആന ബസിന്റെ ചില്ല് തകര്‍ക്കുകയായിരുന്നു. ആന കാട്ടിലേയ്ക്ക് തിരികെ പോയതോടെയാണ് യാത്രക്കാര്‍ക്ക് സമാധാനമായത്.