ചെറുവത്തൂര്‍: പരാതികള്‍ക്കൊടുവില്‍ എയ്ഡഡ് സ്‌കൂള്‍ വിദ്യാര്‍ഥികള്‍ക്കുള്ള സൗജന്യ യൂനിഫോമിന് തുക അനുവദിച്ചു. അധ്യയനവര്‍ഷം അഞ്ചു മാസം പിന്നിടുമ്പോഴാണ് കുട്ടികള്‍ക്ക് യൂനിഫോം ലഭിക്കുന്നത്. സര്‍ക്കാര്‍ വിദ്യാലയങ്ങളിലെ ഒന്നാംതരം മുതല്‍ എട്ടാംക്ലാസ് വരെ, എ.പി.എല്‍. വിഭാഗത്തില്‍പ്പെടുന്ന ആണ്‍കുട്ടികള്‍ ഒഴികെയുള്ള വിദ്യാര്‍ഥികള്‍ക്ക് യൂനിഫോം വിതരണം അധ്യയന വര്‍ഷാരംഭത്തില്‍ തന്നെ പൂര്‍ത്തിയായിരുന്നു. 71,71,72,000 രൂപയാണ് ഇപ്പോള്‍ യൂനിഫോമിനായി അനുവദിച്ചിരിക്കുന്നത്. ഈ തുക ഉടന്‍ തന്നെ വിദ്യാഭ്യാസ ഡെപ്യൂട്ടി ഡയറക്ടര്‍മാര്‍ക്ക് നല്‍കും. ഈ അധ്യയന വര്‍ഷം എ.പി.എല്‍, ബി പി എല്‍ , ആണ്‍ പെണ്‍ വേര്‍തിരിവില്ലാതെ ഒന്ന് മുതല്‍ എട്ടുവരെ ക്ലാസുകളിലുള്ള മുഴുവന്‍ കുട്ടികള്‍ക്കും സൗജന്യ യൂനിഫോം നല്‍കാന്‍ സര്‍ക്കാര്‍ നേരത്തെ തന്നെ തീരുമാനിച്ചിരുന്നു.
ഇതിന്റെ അടിസ്ഥാനത്തില്‍ നേരത്തെ യൂനിഫോം ലഭിക്കാതിരുന്ന സര്‍ക്കാര്‍ വിദ്യാലയങ്ങളിലെ എ.പി.എല്‍ ആണ്‍കുട്ടികള്‍ക്കും ഈ മാസം തന്നെ യൂനിഫോം ലഭിക്കും. ഒരു കുട്ടിക്ക് രണ്ടുജോഡി യൂനിഫോമിനു 400 രൂപയാണ് നീക്കിവച്ചിരിക്കുന്നത്. വിദ്യാഭ്യാസ ഡയറക്ടര്‍മാര്‍ ഉടന്‍ തന്നെ തുക പ്രധാനാധ്യാപകര്‍ക്ക് കൈമാറും. ഈ മാസം മുപ്പതിനകം യൂനിഫോം വിതരണം പൂര്‍ത്തിയാക്കാനാണ് തീരുമാനം. അടുത്ത അധ്യയനവര്‍ഷം വിദ്യാര്‍ഥികള്‍ക്ക് കൈത്തറി യൂനിഫോം നല്‍കാനും തീരുമാനമായിട്ടുണ്ട്.