ഷാങ്ഹായ്: യു.എസ് പ്രസിഡന്റ് തെരഞ്ഞെടുപ്പില്‍ ഡൊണാള്‍ഡ് ട്രംപ് ജയിക്കുമെന്ന് ഉറപ്പിച്ചിരിക്കുകയാണ് ചൈനയുടെ 'വാനര രാജാവ്' ഗെദേ . കഴിഞ്ഞ യൂറോപ്യന്‍ ഫുട്്‌ബോള്‍ ചാമ്പ്യന്‍ഷിപ്പിലെ വിജയിലെ ശരിയായി പ്രവചിച്ച മിടുക്കനാണ് ഈ കുരങ്ങന്‍.
ട്രംപിന്റെയും ഡെമോക്രറ്റിക് പാര്‍ട്ടി സ്ഥാനാര്‍ഥി ഹിലരി ക്ലിന്റന്റെയും രണ്ട് കട്ട് ഔട്ടുകളാണ് പ്രവചനത്തിനായി ഗെദേയുടെ മുന്നില്‍ വച്ചത്. ഗെദേയ്ക്ക് ഒട്ടും സംശയമുണ്ടായിരുന്നില്ല. ട്രംപിന്റെ കട്ടൗട്ടില്‍ കെട്ടിപ്പിടിച്ച് ചുംബനം നല്‍കി തന്റെ പ്രവചന ദൗത്യം നിര്‍വഹിച്ചു. അഞ്ചു വയസുകാരന്‍ ഗെദേയുടെ പ്രവചനം ശരിയാകുമോയെന്നത് കാത്തിരുന്ന് കാണണമെന്നു മാത്രം.
യൂറോപ്യന്‍ ഫുട്‌ബോള്‍ ചാമ്പ്യന്‍ഷിപ്പില്‍ വിജയിയെ പ്രവചിക്കാനായി ഫൈനലില്‍ മത്സരിച്ച പോര്‍ച്ചുഗലിന്റെയും ഫ്രാന്‍സിന്റെയും കൊടികള്‍ ഓരോ പഴത്തിനൊപ്പം ഗെദേയുടെ മുന്നിലേക്ക് വയ്ക്കുകയായിരുന്നു. തുടര്‍ന്ന് ഗെദേ പോര്‍ച്ചുഗലിന്റെ കൊടിയുടെ അടുത്തേക്ക് നടന്ന് അതിനടുത്തുണ്ടായിരുന്ന പഴം ഭക്ഷിച്ചു. മത്സരത്തില്‍ പോര്‍ച്ചുഗല്‍ ജയിക്കുകയും ചെയ്തു.