മഞ്ചേരി: തൃപ്പനച്ചി മഖാം ഉറൂസിന് ഇന്ന് അന്നദാനത്തോടെ സമാപനമാകും. രാവിലെ 7.30ന് മഖാം സിയാറത്തിനു സമസ്ത ട്രഷറര്‍ സയ്യിദ് മുഹമ്മദ് ജിഫ്‌രി മുത്തുകോയ തങ്ങള്‍ നേതൃത്വം നല്‍കും. അബ്ദുസ്സമദ് പൂക്കോട്ടൂര്‍ അനുസ്മരണ പ്രഭാഷണം നടത്തും. ഒന്‍പതിന് സമാപന സമ്മേളനം പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത പ്രസിഡന്റ് കുമരംപുത്തൂര്‍ എ.പി മുഹമ്മദ് മുസ്‌ലിയാര്‍ പ്രാര്‍ഥനക്ക് നേതൃത്വം നല്‍കും. സമസ്ത ജനറല്‍ സെക്രട്ടറി കെ ആലിക്കുട്ടി മുസ്‌ലിയാര്‍ അധ്യക്ഷനാകും. സയ്യിദ് അബ്ബാസലി ശിഹാബ് തങ്ങള്‍, പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി സംബന്ധിക്കും.  രാവിലെ പത്തുമുതല്‍ വൈകീട്ടു മൂന്നുവരെ അന്നദാനം നടക്കും. അന്‍പതിനായിരം പാക്കറ്റുകളിലായാണ് അന്നദാനം നടത്തുന്നത്. ഇതിനായി 450 പ്രത്യേക വളണ്ടിയര്‍മാരെ തെരഞ്ഞെടുത്തിട്ടുണ്ട്. ഇന്നലെ നടന്ന മതപ്രഭാഷണ പരിപാടി  സയ്യിദ് മുഈനലി ശിഹാബ് തങ്ങള്‍ ഉദ്ഘാടനം ചെയ്തു. ഡോ. ബഹാഉദ്ദീന്‍ മുഹമ്മദ് നദ്‌വി, ഖലീല്‍ ഹുദവി തളങ്കര സംസാരിച്ചു.