വേങ്ങര: അങ്കണവാടിക്കു സമീപം റോഡില്‍ ചാക്കുകണക്കിന് അറവു മാലിന്യം തള്ളി. സംഭവത്തെ തുടര്‍ന്നു നാട്ടുകാരും കുരുന്നുകളും ദുരിതത്തിലായി. പറപ്പൂര്‍ പഞ്ചായത്തിലെ ഇരിങ്ങല്ലൂര്‍ പുള്ളാട്ടങ്ങാടി വെട്ടം പള്ളക്കു സമീപത്താണ് കഴിഞ്ഞ ദിവസം അര്‍ധരാത്രി അജ്ഞാതര്‍ മാലിന്യം തള്ളിയത്.  പുലര്‍ച്ചെ നിസ്‌കാരത്തിന് പള്ളിയിലേക്കു പോയവരാണ് ആദ്യം മാലിന്യം കണ്ടത്. കാല്‍നടയാത്രക്കാര്‍ക്കും  വാഹനത്തിനും കടന്നുപോവാന്‍ സാധിക്കാത്തവിധം റോഡിനു കുറുകെ നിരവധി ചാക്കുകളിലാക്കി കൂട്ടിയിട്ട നിലയിലായിരുന്നു. നാട്ടുകാരുടെ പ്രതിഷേധത്തെ തുടര്‍ന്നു പഞ്ചായത്ത് പ്രസിഡന്റ് പറങ്ങോടത്ത് മുഹമ്മദ്കുട്ടി, വൈസ്പ്രസിഡന്റ് പി.വി.കെ ഹസീന എന്നിവരുടെ നേതൃത്വത്തില്‍ മണ്ണുമാന്തിയന്ത്രം ഉപയോഗിച്ചു നീക്കംചെയ്തു. അധികൃതരുടെ പാരാതിയില്‍ വേങ്ങര പൊലിസ് കേസെടുത്ത് അന്വേഷണം ആരംഭിച്ചു. പരിസര പ്രദേശത്തെ സി.സി.ടി.വി ദൃശ്യങ്ങള്‍ പരിശോധിച്ചു മാലിന്യം തള്ളിയ വാഹനം കണ്ടെത്താനുള്ള ശ്രമത്തിലാണ് നാട്ടുകാര്‍.