പേരാമ്പ്ര: വനം, വൈദ്യുതി വകുപ്പുകള്‍ തമ്മിലുള്ള ശീതസമരം കാരണം ജില്ലയിലെ പ്രധാന ടൂറിസ്റ്റ് കേന്ദ്രമായ കക്കയം അനിശ്ചിതകാലത്തേക്കു അടച്ചുപൂട്ടി.
ടൂറിസ്റ്റ്  കേന്ദ്രത്തിലെത്തുന്ന സഞ്ചാരികളില്‍ നിന്ന് ഈടാക്കുന്ന ചാര്‍ജിനെ ചൊല്ലിയുണ്ടായ തര്‍ക്കമാണ് പൂട്ടാന്‍  കാരണമായത്. വര്‍ഷങ്ങളായി ഇരുവകുപ്പുകളും തുടരുന്ന അവകാശ തര്‍ക്കം പരിഹരിക്കാന്‍ കഴിയാതെ വന്നതോടെയാണ് അടച്ചുപൂട്ടിയത്. ടൂറിസ്റ്റ് കേന്ദ്രത്തില്‍ വേണ്ട സൗകര്യങ്ങള്‍ ഏര്‍പ്പെടുത്താതെ  സഞ്ചാരികളെ പിഴിയുന്ന സമീപനമാണ് ഇരുവകുപ്പുകളും തുടരുന്നത്.
അശാസ്ത്രീയമായ ഫീസ്  ഈടാക്കി സഞ്ചാരികളെ ചൂഷണം ചെയ്യുന്ന നടപടികള്‍ക്കെതിരേ പ്രതിഷേധമുയരുന്നുണ്ട്. ടൂറിസം മേഖലയില്‍ മലയോരത്തുണ്ടാകുന്ന വികസനത്തെ തകര്‍ക്കാനുള്ള നീക്കത്തില്‍  പ്രദേശവാസികളുടെ ആശങ്ക സര്‍ക്കാറിന്റെ ശ്രദ്ധയില്‍പ്പെടുത്താനുള്ള ഒരുക്കത്തിലാണ് നാട്ടുകാര്‍. വിഷയത്തില്‍  ഇരുവകുപ്പുകളുടെയും ഉന്നതതല ഉദ്യോഗസ്ഥരുടെ യോഗം വിളിച്ചുചേര്‍ക്കാന്‍ മുഖ്യമന്ത്രി താല്‍പ്പര്യമെടുക്കണമെന്ന ആവശ്യവും ശക്തമാണ്.