കുറ്റ്യാടി: കുറ്റ്യാടി- നാദാപുരം സംസ്ഥാന പാതയില്‍ നിയന്ത്രണം വിട്ട ലോറി തൊട്ടടുത്തുള്ള അരവ് കേന്ദ്രത്തിലേക്ക് പാഞ്ഞുകയറി വന്‍ അപകടം ഒഴിവായി. ഇന്നലെ പുലര്‍ച്ചെ മൂന്നോടെ മംഗലാപുരത്തു നിന്ന് കുറ്റ്യാടിയിലേക്ക് ഗ്യാസ് സിലിണ്ടര്‍ കയറ്റി വന്ന ലോറിയാണ് കുളങ്ങരത്താഴത്ത് അപകടത്തില്‍ പെട്ടത്. കടയുടെ ഓടും, കഴുക്കോലും മറ്റും തകര്‍ന്നിട്ടുണ്ട്. ലോറി അപകടത്തില്‍പ്പെട്ടതിനെ തുടര്‍ന്ന് പ്രദേശത്തേക്കുള്ള വൈദ്യുതി ബന്ധം വിഛേദിച്ചു. അപകടമേഖലയായ കുളങ്ങരത്താഴ ഭാഗത്ത് വാഹനങ്ങളുടെ വേഗത കുറക്കാന്‍ രണ്ട് ഭാഗങ്ങളിലും വരമ്പുകള്‍ സ്ഥാപിച്ചിട്ടുണ്ടെങ്കിലും അമിതവേഗതയിലാണ് വാഹനങ്ങള്‍ പോകുന്നതെന്ന് നാട്ടുകാര്‍ക്ക് പരാതിയുണ്ട്.