മാറഞ്ചേരി: സ്വാതന്ത്ര്യ സമര സേനാനികളുടെ ത്യാഗം നാട് തിരിച്ചറിയുന്നില്ലെന്നു മുന്‍ മുഖ്യമന്ത്രി ഉമ്മന്‍ ചാണ്ടി. അഴിമതിയും വര്‍ഗീയതയും സ്വജനപക്ഷപാതവും സ്വാതന്ത്ര്യ സമര സേനാനികളുടെ ജീവിതപാത പിന്തുടര്‍ന്നാല്‍ ഇല്ലാതാകുമെന്നും അദ്ദേഹം അഭിപ്രായപ്പെട്ടു. സ്വാതന്ത്ര്യ സമര സേനാനി ഇ. മൊയ്തു മൗലവി സ്മാരക ഭവനങ്ങളുടെ താക്കോല്‍ കൈമാറ്റവും ഗ്രാമീണ്‍ പുരസ്‌കാര വിതരണവും ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിലെ മികച്ച പൊതുപ്രവര്‍ത്തകനെന്ന നിലയില്‍ കെ. മുരളീധരന്‍ എം. എല്‍. എയ്ക്കും പൊന്നാനി താലൂക്കിലെ മികച്ച ജീവകാരുണ്യ പ്രവര്‍ത്തകനെന്ന നിലയില്‍ കെ. വി. അബ്ദുല്‍ നാസറിനുമുള്ള ഇ. മൊയ്തു മൗലവി സ്മാരക പ്രഥമ ഗ്രാമീണ്‍ പുരസ്‌കാരം നിയമസഭാ സ്പീക്കര്‍ പി. ശ്രീരാമകൃഷ്ണന്‍ നല്‍കി.
ഇ. മൊയ്തു മൗലവി സ്മാരക ഭവനങ്ങളുടെ താക്കോല്‍ കൈമാറ്റം ആര്യാടന്‍ മുഹമ്മദ് നിര്‍വഹിച്ചു. വെബ് സൈറ്റിന്റെ ഉദ്ഘാടനം വി.ടി.ബലറാം എം.എല്‍.എ യും പ്രതിഭാ പുരസ്‌കാര വിതരണം ഷാഫി പറമ്പില്‍ എം.എല്‍ എ, ടി.സിദ്ദീഖ്, യു. അബൂബക്കര്‍ എന്നിവരും നിര്‍വഹിച്ചു. മൊയ്തു മൗലവിയുടെ മകന്‍ എം. റഷീദിനെ ചടങ്ങില്‍ ആദരിച്ചു. ട്രസ്റ്റ് ചെയര്‍മാന്‍ ഷാജി കാളിയത്ത് അധ്യക്ഷനായി. പി.ടി.അജയ് മോഹന്‍, പ്രേമജ സുധീര്‍, റിയാസ് വെളിയങ്കോട്, അബ്ദുള്‍ ഗഫാര്‍, ഷാജി വെളിയങ്കോട് തുടങ്ങിയവര്‍ സംസാരിച്ചു. ഗസലില്‍ വിസ്മയം തീര്‍ക്കുന്ന ഉമ്പായി, ഷഹബാസ് അമന്‍, ഗായത്രി എന്നിവര്‍ ഒന്നിച്ചുള്ള ഗസല്‍ സംഗീത ചരിത്രത്തിലെ അപൂര്‍വമായ ഗസല്‍ സംഗമസന്ധ്യയുമുണ്ടായി.