വാടാനപ്പള്ളി: റോഡ് നിര്‍മ്മാണത്തിനായി മെറ്റല്‍ കയറ്റി വന്ന ടിപ്പര്‍ ലോറി റോഡരികിലെ കുളത്തിലേക്ക് തലക്കീഴായി മറിഞ്ഞു. തൃപ്രായര്‍ വാഴക്കുളം ക്ഷേത്രത്തിന് സമീപം ഗ്രാമസ്വരാജ് റോഡിലാണ് സംഭവം. ടിപ്പര്‍ ലോറി ചരിഞ്ഞയുടന്‍ ഡ്രൈവറും ക്ലീനറും പുറത്തേക്ക് ചാടിയതിനാല്‍ ദുരന്തം ഒഴിവായി. അപകട ദൃശ്യം ചിത്രീകരിക്കുന്നതിനിടെ ഗ്രാമ്യ ചാനല്‍ കാമറാമാനും തൃപ്രയാര്‍ പ്രസ് ഫോറം സെക്രട്ടറിയുമായ സതീഷ് കല്ലയിലിനെ ലോറി ഉടമയുമായി ബന്ധപ്പെട്ടവര്‍ തടയുകയും ഭീഷണിപ്പെടുത്തുകയും ചെയ്തു. തുടര്‍ന്ന് നാട്ടുകാര്‍ എത്തിയതോടെയാണ് പ്രശ്‌നം പരിഹരിക്കപ്പെട്ടത്. ക്രെയിനും ജെ.സി.ബിയും ഉപയോഗിച്ച് ലോറി പിന്നീട് കരക്ക് കയറ്റി.