ചെറുവത്തൂര്‍: റവന്യു വകുപ്പ് ഉദ്യോഗസ്ഥരും പൊലിസും അകാരണമായി ലോറികളും ജെ.സി.ബികളും പിടിച്ചെടുക്കുന്നുവെന്നാരോപിച്ചു ചെറുവത്തൂര്‍, നീലേശ്വരം മേഖലകളില്‍ ടിപ്പര്‍ ലോറി-ജെ.സി.ബി ഉടമകള്‍ അനിശ്ചിതകാല പണിമുടക്ക് തുടങ്ങി. ജില്ലയുടെ തെക്കന്‍ മേഖലകളെ പണിമുടക്കു പ്രതികൂലമായി ബാധിക്കും. നിര്‍മാണ മേഖലയിലെ അവശ്യ സാധനങ്ങളായ ചെങ്കല്ല്, പൂഴി, ജില്ലി, മണ്ണ് എന്നിവയാണു ടിപ്പറുകളില്‍ എത്തിക്കുന്നത്. എന്നാല്‍ ഈ വാഹനങ്ങള്‍ പൊലിസും റവന്യു വകുപ്പും നിസാരകാരണങ്ങള്‍ പറഞ്ഞു പിടിച്ചെടുക്കുകയാണെന്നു സമരക്കാര്‍ പറയുന്നു. പിടികൂടിയ വാഹനങ്ങള്‍ വിട്ടു കിട്ടാന്‍ രണ്ടു മാസമെങ്കിലുമെടുക്കും.
പൊലിസ് സ്റ്റേഷന്‍ പരിസരങ്ങളില്‍ സൂക്ഷിക്കുന്ന ഇത്തരം വാഹനങ്ങളില്‍ നിന്നു വിലപ്പെട്ട ഭാഗങ്ങള്‍ നഷ്ടമാകുന്നതായും ഇവര്‍ ചൂണ്ടിക്കാട്ടുന്നു. ഈ സാഹചര്യത്തില്‍ പിടിച്ചെടുക്കുന്ന വാഹനങ്ങള്‍ പിഴ ചുമത്തി അപ്പോള്‍ തന്നെ വിട്ടു തരിക, വാഹനത്തില്‍ കയറ്റുന്ന സാധനങ്ങള്‍ക്കുള്ള പെര്‍മിറ്റ് കാലതാമസം കൂടാതെ അനുവദിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് അനിശ്ചിതകാല പണിമുടക്ക് ആരംഭിച്ചിരിക്കുന്നത്. നവംബര്‍ ഒന്‍പതിന് കാഞ്ഞങ്ങാട് ആര്‍.ഡി ഓഫിസിലേക്കു മാര്‍ച്ചും ധര്‍ണയും സംഘടിപ്പിക്കാനും തീരുമാനിച്ചിട്ടുണ്ട്. പണിമുടക്കിന്റെ ഭാഗമായി ചെറുവത്തൂരില്‍ പ്രകടനവും യോഗവും സംഘടിപ്പിച്ചു.സി.ഐ.ടി.യു ജില്ലാ വൈസ് പ്രസിഡന്റ് മുനമ്പത്ത് ഗോവിന്ദന്‍ ഉദ്ഘാടനം ചെയ്തു.
പ്രകാശന്‍ മുണ്ടക്കണ്ടം അധ്യക്ഷനായി. വി.സി രവി, വേണുഗോപാലന്‍ കയ്യൂര്‍ സംസാരിച്ചു.