ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ഒന്നാം സ്ഥാനത്തുള്ള മാഞ്ചസ്റ്റര്‍ സിറ്റിക്ക് അപ്രതീക്ഷിത സമനില. മിഡ്ഡ്ല്‍സബ്രോയാണ് അവരെ അവസാന സെക്കന്‍ഡില്‍ നേടിയ ഗോളില്‍ സമനിലയില്‍ തളച്ചത്. 43ാം മിനുട്ടില്‍ അഗ്യെറോയുടെ ഗോളില്‍ മുന്നിലെത്തിയ സിറ്റി മത്സരം വിജയിച്ചെന്നു തോന്നിച്ച ഘട്ടത്തിലാണ് സ്വന്തം തട്ടകത്തില്‍ സമനില വഴങ്ങിയത്. ഇന്നു നടക്കുന്ന മത്സരത്തില്‍ ആഴ്‌സണല്‍ വിജയിച്ചാല്‍ സിറ്റിക്ക് ഒന്നാം സ്ഥാനം നഷ്ടമാകും.
മറ്റു മത്സരങ്ങളില്‍ ബേണ്‍മൗത്തിനെ 2-1നു വീഴ്ത്തി സണ്ടര്‍ലാന്‍ഡ് സീസണിലെ ആദ്യ വിജയം സ്വന്തമാക്കി. ബേണ്‍ലി 3-2നു ക്രിസ്റ്റല്‍ പാലസിനേയും പരാജയപ്പെടുത്തി. വെസ്റ്റ്ഹാം- സ്റ്റോക് സിറ്റി പോരാട്ടം 1-1നു സമനില.
മാഡ്രിഡ്: സ്പാനിഷ് ലാ ലിഗയില്‍ കരുത്തരായ അത്‌ലറ്റിക്കോ മാഡ്രിഡിനെ റയല്‍ സോസിഡാഡ് അട്ടിമറിച്ചു. മറുപടിയില്ലാത്ത രണ്ടു ഗോളുകള്‍ക്കാണ് അത്‌ലറ്റിക്കോ തോല്‍വി വഴങ്ങിയത്. മറ്റു മത്സരങ്ങളില്‍ മലാഗ 3-2നു സ്‌പോര്‍ടിങ് ഗിജോണിനെ പരാജയപ്പെടുത്തി. ഗ്രനാഡ- ഡിപോര്‍ടീവോ പോരാട്ടം 1-1നു സമനില.
മ്യൂണിക്ക്: ജര്‍മന്‍ ബുണ്ടസ് ലീഗയില്‍ കരുത്തരായ ബയേണ്‍ മ്യൂണിക്കിനു സ്വന്തം മണ്ണില്‍ സമനിലക്കുരുക്ക്. ഹോഫന്‍ഹെയിമാണ് ചാംപ്യന്‍മാരെ കുടുക്കിയത്. 1-1നായിരുന്നു ബാവേറിയന്‍സ് വെട്ടിലായത്. മറ്റൊരു മത്സരത്തില്‍ ബൊറൂസിയ ഡോര്‍ട്മുണ്ട് 5-2നു ഹാംബര്‍ഗറിനെ തുരത്തി.
മറ്റു മത്സരങ്ങളില്‍ വോള്‍വ്‌സ്ബര്‍ഗ് 3-0ത്തിനു ഫ്രീബര്‍ഗിനേയും ബയര്‍ ലെവര്‍കൂസന്‍ 3-2നു ഡാംസ്റ്റഡിനേയും ഹെര്‍ത 3-0ത്തിനു ബൊറൂസിയ മോണ്‍ചന്‍ഗ്ലഡ്ബാചിനേയും ഓഗ്‌സബര്‍ഗ് 2-0ത്തിനു ഇംഗോള്‍സ്റ്റഡിനേയും വീഴ്ത്തി.