സാര്‍ബ്രക്കന്‍: ഇന്ത്യയുടെ വര്‍മ സഹോദരന്‍മാരായ സൗരഭ് വര്‍മയും സമീര്‍ വര്‍മയും ബിറ്റ്ബര്‍ഗര്‍ ഓപണ്‍ ഗ്രാന്‍ഡ് പ്രിക്‌സ് ഗോള്‍ഡ് ബാഡ്മിന്റണിന്റെ സെമിയിലേക്ക് മുന്നേറി. പുരുഷന്‍മാരുടെ സിംഗിള്‍സ് പോരാട്ടത്തില്‍ സൗരഭ് ലോക 13ാം നമ്പര്‍ താരം ജര്‍മനിയുടെ മാര്‍ക്ക് സ്വീബ്‌ളറെ അട്ടിമറിച്ചു. സ്‌കോര്‍: 21-15, 16-21, 21-15. സെമിയില്‍ ഡെന്‍മാര്‍കിന്റെ ആന്റെര്‍സ് ആന്റന്‍സനാണ് സൗരഭിന്റെ എതിരാളി.
സമീര്‍ ഉക്രൈന്‍ താരം ആര്‍ടെം പോച്റ്ററോവിനെയാണ് വീഴ്ത്തിയത്. സ്‌കോര്‍: 21-14, 21-16. ചൈനയുടെ ഷി യുഖിയാണ് സമീറിന്റെ സെമി എതിരാളി.

കേരളത്തിനു തകര്‍ച്ച

ആലപ്പുഴ: ഹരിയാനക്കെതിരായ കൂച്ച് ബിഹാര്‍ ട്രോഫി അണ്ടര്‍ 19 ചതുര്‍ദിന പോരാട്ടത്തില്‍ കേരളം ഒന്നാം ഇന്നിങ്‌സില്‍ 270 റണ്‍സിനു പുറത്ത്. ടോസ് നേടി ബാറ്റിങ് തിരഞ്ഞെടുത്ത കേരളത്തിനു മികച്ച സ്‌കോറിലെത്താന്‍ സാധിച്ചില്ല. മധ്യനിര ബാറ്റ്‌സ്മാന്‍ അശ്വിന്‍ ആനന്ദാണ് (54) ടോപ് സ്‌കോറര്‍. 37 റണ്‍സെടുത്തു പുറത്താകാതെ നിന്ന അഖില്‍ അനില്‍, 31 റണ്‍സെടുത്ത അര്‍ജുന്‍ അജി എന്നിവരും തിളങ്ങി. ഹരിയാനക്കായി എം.എസ് രതി മൂന്നു വിക്കറ്റും രാഘവ്, സൂരജ് ഷൗവാസ് എന്നിവര്‍ രണ്ടു വിക്കറ്റുകളും വീഴ്ത്തി. രണ്ടാം ദിനമായ ഇന്ന് ഹരിയാന ആദ്യ ഇന്നിങ്‌സ് ആരംഭിക്കും.

രഞ്ജി: ആദ്യ ദിനത്തില്‍ കേരളം

ജയ്പൂര്‍: ഹരിയാനക്കെതിരായ രഞ്ജി ട്രോഫിയിലെ ആദ്യ ദിനം കേരളത്തിന്റെ കൈയില്‍ ഭദ്രം. ടോസ് നേടി എതിരാളികളെ ബാറ്റിങിനയച്ച കേരളത്തിന്റെ തന്ത്രം ഫലവത്തായി. ഒന്നാം ദിനം കളി നിര്‍ത്തുമ്പോള്‍ ഹരിയാന എട്ടു വിക്കറ്റ് നഷ്ടത്തില്‍ 227 റണ്‍സെന്ന നിലയില്‍ പതറുന്നു.
നാലു വിക്കറ്റുകള്‍ വീഴ്ത്തിയ സന്ദീപ വാര്യരുടേയും മൂന്നു വിക്കറ്റെടുത്ത വിനോദ് കുമാറിന്റേയും ബൗളിങാണ് ഹരിയാനയെ വെട്ടിലാക്കിയത്. 51 റണ്‍സെടുത്തു പുറത്തകാതെ നില്‍ക്കുന്ന രോഹിത് ശര്‍മയിലാണ് ഹരിയാനയുടെ ഏക പ്രതീക്ഷ. രോഹിതാണ് ടോപ് സ്‌കോറര്‍. 30 റണ്‍സെടുത്ത മോഹിത് ഹൂഡയും പിടിച്ചു നിന്നു.